Жерлесіміз Испанияда өткен халықаралық ән байқауынан жүлдемен оралды

Қарағандылық талантты әнші Елена Федорова Испанияда өткен Mediterranean Legends халықаралық ән байқауында бірінші орын иеленді. Ол «Академиялық вокал» номинациясы бойынша жеңімпаз атанды. Қарағанды музыкалық комедия театрының солист-вокалисінің орындау шеберлігі еуропалық көрермендердің көңілінен шығып, өнерін жоғары бағалаған.

– Еуропадағы музыкалық байқауға алғаш рет қатыстым. Бұл мен үшін үлкен тәжірибе болды. Байқаудың бірінші кезеңінде композитор С. Еркімбековтің «Дархан дала» әнін орындауды ұйғардым. Бұл шығарма тыңдаушыларға ұнады. Екінші кезеңде Л. Бернштейннің «Вестсайд тарихындағы» Марияның ариясын орындадым. Гала-концертте Л. Хамидидің «Қазақ вальсі» және Ф. Лоудың «I could have danced» әндерін шырқадым. Маған өзімнің вокалдық қабілетімді көрсетіп қана қоймай, испандық көрермендерді Қазақстанның бай мұрасымен және көрнекті композиторларымен таныстыру бақыты бұйырғанына шексіз ризамын, – дейді Елена Федорова.

Ілияс ДҮНГЕНБАЙҰЛЫ