Жасұлан – әлемдік жарыстың жеңімпазы

Бұқар жырау ауданының тумасы Жасұлан Нұрболат Unifigһt жекпе-жек сайысынан Әлем чемпионатында ел намысын қорғап, мерейімізді асқақтатты. Ол 17 мемлекеттен 500-ден астам спортшы қатысқан әлемдік додада қарсылас шақ келтірмей, 60 килограмм салмақта Әлем чемпионы атанды.

Ерекше атап өту керек, осы спорт түрін небәрі үш айдың ішінде меңгерген ол осы жолы жоғары нәтижеге қол жеткізді. Оған Жасұланның еркін күреспен сегіз жылдай айналысқаны да септігін тигізгені сөзсіз.

Қазір Жасұлан Е.Бөкетов атындағы Қарағанды зерттеу университетінің денешынықтыру және спорт факультетінде оқып жүр. Оның бұл жетістігі кейінгі жастарға үлгі боларлықтай.

Сонымен қатар, Әлем чемпионатында оның командалас достары, Қарқаралы ауданы Қызыл ту ауылының өрендері Ойрат Мәди мен Асанәлі Манатұлы да күміс жүлдеге ие болды.

Ержан ИМАШ,
Бұқар жырау ауданы.
Ortalyq.kz