Жас ақындар шеберліктерін көрсетті
Тәттімбет атындағы өнер колледжінде өткен айтыста Қарағанды облысы мектептерінің 7–11 сынып оқушылары Құрманғазы Сағырбайұлы мен Жамбыл Жабаевтың шығармашылығын дәріптеп, шешендік өнерін көрсетті. Композитор Құрманғазының туғанына 200 жыл толуына орай өткен поэтикалық сайысқа өңірдің 20-дан астам оқушысы қатысты.
Сөз виртуоздарының сайысы екі бағытта өтті. Бірінші, тақырыптық айтыста Бұқар жырау ауданының сегізінші сынып оқушысы, «Руханият» қосымша білім беру орталығының тәрбиеленушісі Тілек Мәлік жеңіске жетті. Оқушы атақты айтыскер Дидар Камиевтен сабақ алады. Ол аудандық және облыстық мәнерлеп оқу байқауларының бірнеше дүркін жүлдегері, Бұқар жырау Қалқаманұлының 50 шығармасын жатқа біледі.
– Мен екінші жыл қатарынан «Руханият» өнер мектебінде жыршы-жырау үйірмесінде тәлім алып келемін. Облыстық кезеңге дейін аудандық деңгейде І орын иелендім. Айтыстың облыстық кезеңіне қатысу оңай болған жоқ. Бірақ мұғалімім Дидар Камиевтің жақсы дайындығы мен қолдауының арқасында І орын иелендім. Республикалық сахналарда да жеңіске жетуді армандаймын, – деді Тілек Мәлік.
Осы турда ІІ орынды Осакаров ауданы Жамбыл атындағы жалпы білім беретін мектептің тоғызыншы сынып оқушысы Асқарбек Аманбек иеленді. Шет ауданы Ю.Гагарин атындағы мектеп-лицейінің 10-сынып оқушысы Бақдәулет Хуаныш үздік үштікті қорытындылады.
Айтыстың екінші блогында қарсыластар поэтикалық репликалармен алмасты, І орынды Нұра ауданы Жараспай ауылының жетінші сынып оқушысы Аярыс Қапыш иеленді. Жас жігіт халық шығармашылығын, әдебиетті жақсы көреді.
– Мені айтысқа қазақ тілі мен әдебиеті пәнінің мұғалімі Дінжан Құсайын дайындады. Біздің мектепте арнайы үйірме жоқ, бірақ мұғалім әрдайым әдебиетті жақсы көретін, өлең жазатын балалармен айналысуға уақыт табады. Мен оған ризамын және үмітін ақтағаныма қуаныштымын. Болашақта ақындардың республикалық жарыстарында да өз күшімді сынап көргім келеді, – дейді Аярыс Қапыш.
Осы бағытта ІІ орынды С. Сейфуллиннің № 7 Балқаш мектеп-гимназиясының тоғызыншы сынып оқушысы Бекарыс Амангелді иеленді. ІІІ орында – Теміртау қаласының № 10 ЖББОМ жетінші сынып оқушысы Бақкелді Мелдешов.
Жеңімпаздар дипломдармен және ақшалай сертификаттармен марапатталды. Үздік оқушылар алғыс хаттармен марапатталды.
Облыс әкімінің баспасөз қызметі.
