Жаңа нысан – жұрт игілігіне
Тұңғыш Президент күні қарсаңында Жаңаарқа ауданындағы Ақтау ауылдық округінде өрт сөндіру бекеті ашылды. Жаңа нысанның ашылу салтанатына аудан әкімінің міндетін атқарушы Қанат ҚОЖЫҚАЕВ қатысты.
Аудан басшысының міндетін атқарушымен бірге облыстық төтенше жағдайлар департаментінің өкілі Бауыржан Бадылбаев пен ауыл тұрғыны Мәнсүр Әбдіғалымов бекеттің лентасын қиды.
Ақтау ауылы – өрт қаупі жоғары аймақтардың бірі. Аудан орталығынан 135 шақырым шалғайда жатқан Ақтау ауылы таулы және жазық далалы жерде орналасқан. Сондықтан, бұл аймақта өрт деректері жиі тіркелетін. Енді, оқыс оқиға өрбіген жағдайда халық аудан орталығынан келетін бригадасын сарылып күтпейді. Ол үшін арнайы қызмет жасағы әзір тұр.
Аудандық бюджеттен бөлінген 4 млн. теңгеден астам қаржыға өрт сөндіру бекеті қажетті құрал-жабдықтармен толық қамтамасыз етілді. Сонымен қатар, ақтаулықтарға облыстық төтенше жағдайлар департаменті «ЗиЛ» маркалы өрт сөндіру техникасын тарту етті.
Бекетте 6 адам жұмыспен қамтылды. Қызметкерлердің барлығы арнайы курстан өткен мамандар.
Индира АСАМИДАНОВА,
аудан әкімінің баспасөз хатшысы.
ЖАҢААРҚА ауданы.
