Виртуалды балабақша іске қосыла ма?
Қарағанды облысында еліміздегі алғашқы «Sabidamu виртуалды балабақшасы» онлайн-платформасы іске қосылуы мүмкін. Бұл ата-аналарға балаларын пайдалы іспен айналысуға ғана емес, сонымен қатар, ерте дамуға көмектесетін сапалы әдістемелік материалдарға қол жеткізуге мүмкіндік береді.
– Платформа балабақшаға бармайтын балаларға арналған. Жүйе балалардың белгілі бір жасына сәйкес әртүрлі контент әзірлейді. Балабақшаларда жинақталған тәжірибені онлайн форматқа аударамыз. Сондай-ақ, біз логопедтер, психологтардың жұмысын автоматтандырғымыз келеді. Ата-аналар сұрақтар қоя алады, – деді SabiDamu платформасын әзірлеумен айналысатын «Өрлеу» компаниясының басшысы Фарида Ақшолақова.
Виртуалды балабақша келесі жылдың қаңтарынан бастап жұмыс істейді.
Қарағанды облысында 2 жастан 6 жасқа дейінгі балаларды мектепке дейінгі біліммен қамту сапасы артуда. Өткен жылмен салыстырғанда ол 82,6%-дан 84%-ға дейін өсті. Биыл 1107 орын ашылды.
Айта кеткен жөн, өңірдің 404 мектепке дейінгі ұйымдарына 35 мыңнан астам бала барады. INDIGO.kz ақпараттық жүйесі арқылы бүгінгі таңда балабақшаларға 5 мыңнан астам бала қабылданды.
Жыл соңына дейін облыс бойынша Қарағанды, Шахтинск, Қарқаралы және Шет аудандарында 505 орындық тоғыз мектепке дейінгі ұйым ашу жоспарлануда.
Аяулым СОВЕТ,
«Ortalyq Qazaqstan»
