Қуаты артқан Қоржынтүбек
Көкше теңіз жағасына көсілген Приозерск қаласының осыдан 60 жыл бұрын қазығы қағылды. Елдің қорғаныс саласын нығайтып, Тәуелсіздіктің тұғырлы болуына өлшеусіз үлес қосқан шаһар бүгінде әлеуметтік-экономикалық даму үстінде.
Тарихқа үңілсек, 1961 жылы, 4 наурызда полигонда баллистикалық ракетаның алдыңғы бөлігі атып түсіріліп, аспанда жойып жіберу іс жүзінде дәлелденді. Бұл әлемдік тәжірибеде тұңғыш рет болған еді.
Міне, әскери қаланың маңызды қадамдарының бір ғана мысалы – бұл.
Қала қиын-қыстау заманды да бастан өткерген еді. Бастысы, Тәуелсіздік таңында еңсесі тіктеліп, шаһардың шырайы кірді.
Қазір елдің әл-ауқатын арттыруға бағытталған әлеуметтік бағдарламалар қарқынды жүзеге асырылуда. Мәселен, «Жұмыспен қамтудың жол картасы – 2020» бағдарламасы сияқты маңызды құжаттарға басымдық берілген. Биылдың өзінде 366 адам жұмыссыздықтан қорғаудың әлеуметтік іс-шараларымен қамтылды.
«2016-2020 жылдарға арналған «Денсаулық» мемлекеттік бағдарламасы арқылы халық денсаулығын қорғау ісі жүйелі жолға қойылды.
Тұрғындарға әлеуметтік көмек көрсету іс-шаралары да күн тәртібінен түскен емес. Ауыл шаруашылығы өнімдерінің жәрмеңкесін өткізу де тұрақты жүргізіледі. Нәтижесінде, қала тұрғындары ет және көкөніс өнімдерін нарықтық бағадан 15-20% төмен бағамен сатып алуға мүмкіндік алады.
Қуаты артқан Қоржынтүбекте соңғы жылдары бірнеше әлеуметтік нысандар бой көтерді. Қаланың кәсіпкерлік саласы да оң нәтижелерге бастады.
ПРИОЗЕРСК қаласы.
