Теміртауда ұйымдасқан қылмыстың беті ашылды
Облыстық полиция департаменті ұйымдасқан қылмысқа қарсы күрес басқармасының қызметкерлері жүргізген кешенді жедел-іздестіру іс-шаралары барысында Теміртау қаласында облыстың жедел ахуалына кері әсерін тигізіп, құқыққа қарсы жұмыс істеген жастар тобының іс-әрекетіне нүкте қойылды.
Жүргізілген кешенді жедел жұмыстар барысында фигуранттардың қылмысқа қатысы бары дәлелденіп, олардың қоғамдық орында жасаған қылмыстары бойынша дәлелдемелер жинақталды.
– Қылмыстық топты ұстау барысында 21 тінту жұмысы жүргізіліп, нәтижесінде шолақ ұңғылы атыс қаруы, травматикалық тапанша, оқ-дәрілер, есірткі және психотроптық заттар тәркіленді. Полиция бөліміне 21 адам жеткізіліп, оның негізгі деген 8 күдіктісіне қамауға алу бұлтартпау шарасы қабылданды. Қазіргі уақытта аталған дерек бойынша ҚР Қылмыстық Кодексінің бопсалау, бұзақылық және атыс қаруын сақтау баптары бойынша сотқа дейінгі тергеу әрекеттері жүргізіліп жатыр, – деп хабарлады Қарағанды облыстық полиция департаментінің бастығы Санжар Әділов.
Аида РАХЫМҚҰЛОВА,
ortalyq.kz
