Тариф текетіресі: ұялы операторлар үнсіз
Ұялы операторлар тарифтерін жаппай көтеруде. Бірақ биліктің қылар қайраны болмай тұр. Ал, алпауыттар өз клиенттерінен 4 млрд. теңге өндіруі мүмкін. Жүргізілген арнайы сауалнама байланыс операторларын тығырыққа тірегендей. «Жыл соңына дейін байланыс тарифін көтересіз бе?» деген сауалға операторлар жартымды жауап бере алмай дал.
«Beeline-Қазақстан» компаниясының бас атқарушы директоры Евгений Настрадин жыл соңына таман өсім болмайды деп сендіргісі келді.
– Жоспарда баға көтеру туралы бастама есімде жоқ, сондықтан, тариф көтерілмейтін шығар, – деді Евгений.
«Мобайл Телеком-Сервис (Tele2/ Altel)» компаниясының бас директоры Сергей Коньков тарифтің өсуі жекелеген бағдарлама шеңберінде ғана көрінетінін мәлімдеді.
– База құрылымындағы жекелеген тарифтерге қатысты өсім бар. Дәп қазір монетизация кезеңінен өткен, өскен тарифті тап басып айта алмауымыз мүмкін әрі қиын. Сол себепті, жекелеген тариф бағамы өсуі ықтимал екенін жасырмаймыз, – деп қосты С.Коньков.
Бірақ, «Кселл» АҚ басқарма төрағасы Асхат Өзбеков төтеден қойылған сұраққа жауап беруге дайын емес екенін айтты.
– Бұл мәселеге қазір нақты жауап беруге дайын емеспін. Негізі сауалдарға жауап беруге келгеніммен, бұл сұрағыңызға жауап беру әсте қиын, – деп түйіндеді сөзін спикер Орталық коммуникациялар қызметінде өткен баспасөз мәслихатында.
Ерқанат КЕҢЕСБЕКҰЛЫ,
Ortalyq.kz
