Орталық саябақ алаңындағы тізбекпенен құрылған ақшаңқан үйлерді көріп, ауыл көшіп келгендей күйде боласыз. Киіз үйдің ішінде де, сыртында да түрлі көрме ұйымдастырылған. Ұлттық нақыштағы бұйымдар көздің жауын алады. Қарағандының барлық қолөнер шеберлері – осында.

…Күн көкжиектен арқан бойы көтерілген кезде көпшілік арасында аяқ алып жүрудің өзі қиынға түскендей. Мыңнан аса мейман осында жүр. Саябақтағы думанды тамашалап. Ұлттың келбетін айқындайтын ұлттық киім киген көпшілікке қарап, көзің тояды, көңілің көтеріледі. Қолдан қолға көшіп жүретін қыдырма шапан емес, кәдімгі қазақы оюмен әдіптелген қамзол, шапан, бөрік киген қыз-жігіттер мейрамның мерейін асырғандай көрінді бізге.

Мерекеге келгендердің арасынан нигериялық Эмануэль Зака есімді мейманды кезіктіріп қалдық. Ол қарағандылықтарды «Наурыз құтты болсын!» деп қазақша құттықтап, өзінің көңіл-күйін жеткізді.

– Кадуна қаласынан келдім. Қарағанды қаласының ерекшеліктері өте көп екен. Хал­қының да қонақжай екенін бірден сезіндік. Бүгінгі мейрам ұлттық мереке екені кө­рініп тұр. Барлығы сәнді киімде, ұлттық та­ғамдардың дәмін таттық. Бұл сапарымның осы күнмен тұспа-тұс келуі де мені ерекше қуантты. Өйткені, қазақ елінің салт-дәстүрін, болмысын, мейірімділігін, жалпы қазақ халқының даралығын осы тойдан көруге болады, – дейді шетелдік мейман.

Жиылған жұрт саябақтың жоғарғы жағына қарай ағылды. Өйткені, үлкен сахна алаңында жергілікті өнерпаздардың қатысуымен «Армысың, әз Наурыз!» атты театрландырылған мерекелік іс-шара басталып жатты. Әдеттегідей концерт шымылдығы Сарыарқаны сұлу әнімен тербеген Қ.Байжанов атындағы «Арқа сазы» фольклорлық ансамблінің ән шашуымен түрілді.

«Құс қанатындағы Наурыз» атты театрландырылған қойылымды да көрермен жылы қабылдады. Өнер шеберлері күн мен түннің теңелгенін әсем суреттеді. Ақ жаулықты аналар наурыз көжені әзірлеу рәсімін көрсетті. Қыз-жігіттердің ойын-сауығы да сәтті шықты. Түйемен жеткен Қыдыр ата қолын жайып, елге наурыз-бата берді. Бір сағатқа созылған қойылым Наурыздың мәнін аша түскендей.

Әрмен қарай «Арай» ансамблінің жез­таңдайлары ән-жырмен шашу шашты. Елімізге белгілі эстрада жұлдыздары да сахна алаңынан табылды.

Арқа жұртын халықаралық байқаулардың лауреаты, «Дарын» мемлекеттік сыйлығының иегері, «Голос» және «Славян базары» халықаралық байқауының жүлдегері, көпшілікке Әміре атымен танылған Ернар Сәдірбаев пен «Азия дауысы» фестивалінің жеңімпазы, дара дарын иесі Бауыржан Исаев жаңа жылменен, жаңа күнменен құттықтап, өнерлерін ортаға салды. Көрерменнің көңілін шуақты әндерімен көкке көтерді.

Қарағандылық дизайнерлердің алтын қолынан шыққан ұлттық киімдер шеруі де көпшілікке қол соққызды. Үлкен сахнада «Nauryz-Fashion» деген атаумен өткен сән көрмесінде көпшілік назарына қазақы нақышпен көмкерілген эксклюзивті топтамалар ұсынылды. Әсіресе, «Ұлжан» сән үйі, «Аtelier_gulnur_studiya» тігін студиясы, балаларға арналған заманауи «KORKEM brand» тігін үйі, «SaLIYA» арт студиясы, «Duy.dream» ательесі, «Qushaqta» бренді, «Samga» ұлттық киімдер ательесі, «Asiya boutique atelier» тігін шеберханасы және «Nuramy» компаниясы мен «Eve Art» брендінің өнімдері көпшілікті ерекше әсерге бөлеп, керемет рух сыйлады.

Әдемі кешті әрмен қарай «Арқа сазы» ансамблі жалғастырды. Қызыл іңірге дейін созылған мерекелік кеште Кеншілер мәдениет сарайының көркемөнерпаздар ұжымы да өнерлерін ортаға салды. Олар «Құт-береке мейрамы – Наурыз» атты арнайы әзірлеп әкелген мерекелік бағдарламасы да тартымды өтті деуге болады.

Саябақтың сахна жағы ән мен жырға бөленсе, алаңқай жақта аламан бәйгеден басқа, ұлттық спорт түрлерінен сайыстар ұйымдастырылды. Жігіттер топ-топқа бөлініп, арқан тартысты. Енді бір бөлігінде жігіттер білек күштерін сынап, қол күрестірді. Кір тасын көтеруден де жігіттер бірінен-бірі асты. Дегенмен қарағандылық Аслан Серәлімов бәрінен әлді шықты. 16 келілік кірді 115 рет көтеріп, рекорд орнатты.

– Биылғы Наурызды ерекше қарсы алып отырмын. Неге десеңіздер, жасым 35-ке келіп, міне жақында ғана үйлендім. Жан-жақтан қуаны­шымызға ортақтасып келген туыс­тарым да осында. Өтіп бара жатып, бай­қап қалдық. Жігіттер қиқулап жа­тыр екен. Күштерін сынап. Бала кезімде спортты серік еткенім бар. Сөйтіп, ойда-жоқта жұлдызымыз жанып кетті. Келіншегімнің қасында абырой болды бұл жеңіс, – деп күлді әлді жігіт.

Киіз үйлерде қолөнер, зергерлік өнерге қатысты шеберлік сағаттары өтті. Қалада өскен балалар бір мезгіл байырғы бабалар тұрмысының шетін көре алды. Ақ жаулықты аналар киіз басудың, текемет тоқудың рәсімін көрсетті.

Саябақтың тағы бір алаңынан алтыбақан құрылды. Балалар соның қызығына әбден батты. Аймағымыздағы аңшы, құсшылардың барлығы да той алаңда төбе көрсетті. Тазы-құмайларымен, қаршыға, бүркіттерімен келіп, Наурыз думанның сәнін ашты.

Айтпақшы, дәл осы күні Жастар спорт кешені де дүбірге бөленіп жатқан. Облыстық дене шынықтыру және спорт басқармасы мен Қарағанды қаласы әкімдігі бірлесіп, ұлттық спорт түрлерінен байқау ұйымдас­тырды. Мұнда да қазақ күресі, асық ату, қол күрес, ләңгі, тоғызқұмалақ, арқан тартыс және қой көтеру, кір тасын көтеруден турнир дүбірлеп өтіпті. Спорттың әр түрінен қатысқан жеңімпаздар құрқол қайтқан жоқ. Ақшалай сыйлықтармен марапатталды. Қой көтерген палуанның еншісіне өзі көтерген қой бұйырды. Осылайша, Амал мерекесінен бері ұлттық спорт ұлықталуда.

Наурызнаманың онкүндігіндегі «Ұлттық спорт күнінде» көкпар мау­сымы ресми түрде ашылды. Тәттімбет көшесі бойында «Baspana» ТК мен Күнгей шағын ауданының арасында Қарағанды қаласы әкімінің кубогі үшін ардагерлер арасында төрт команда өзара бақ сынасты. Жеке командалық сайыстан кейін «Жалпы көкпар» өтіп, алаңды шаңға көмді. Оған 200 палуан қатысып, 1 млн. теңгені сарапқа салғанын және атап өтейік.

Ұлы мейрам қарсаңында түрлі қайырымдылық шаралар ұйымдас­тырылды. Мәселен, К.Станиславский атындағы Қарағанды орыс драма театрында көпбалалы және аз қамтылған отбасында тәрбиеленіп жатқан бүлдіршіндерге арналған мерекелік іс-шара өтті. Бір сағат ішінде балалар асық ойнап, садақ атып, арқан тартысты. Арнайы фотоаймақтар ұйымдастырылды. Театрландырылған көріністі тамашалаған балалар соңында би билеп, көңілдерін көтерді. Мұндағы мақсат – балаларға Ұлық мерекенің қадір-қасиетін сезіндіру.

Облысымыздағы барлық аудан-қала, тіпті, ауылдарда Наурыз тойының дүбірлеп өткенін әлеуметтік желіден көріп отырмыз. Олар да онкүндікті үзбей атап өтті.

Қарағанды жұрты Ұлыстың ұлы күнін осындай сипатта қарсы алып, төл мейрамымызды төрге оздырды. Босағамыздан аттаған жаңа жылдың ырысты, несібелі жыл болуын тілеген жұртшылық бір-бірін құшағына риясыз басты.

Қасымхан БҮРКІТҰЛЫ,
Ortalyq.kz

Сообщение Ұлық мейрам ұлықталды появились сначала на «ORTALYQ QAZAQSTAN» газеті.

Жалпы деректерге сүйенсек, Осакаров ауданында тұрғын үйге мұқтаждар ретінде есепте тұрған азаматтардың тізімінде – 996 адам бар. Оның 626-сы – жетім балалар. Ал, 176-сы – әлеуметтік осал топтағылар. Одан бөлек, 136 бюджеттік ұйымдардың қызметкері, 49 көпбалалы отбасылар да бар. 9 отбасы қауіпті деп танылған үйлердің тізімінде тұрғандар.

Сонымен қатар, биылғы жылы коммуналдық тұрғын үй қорынан кезекте тұрғандарға баспана кілті табысталады деп күтілуде.

Ербол ЕРБОЛАТ,
Ortalyq.kz

Сообщение Мереке қарсаңында баспаналы болды появились сначала на «ORTALYQ QAZAQSTAN» газеті.

Қазақтың ұлттық ойындары,  тоғызқұмалақ, бес асық, арқан тарту, сынды ойын түрлерінен турнир өтті.

Түйе мен атқа міну ұйымдастырылып, одан балалар да, үлкендер де әбден қуанып, мәз-мейрам болды.

Сахнада «Қош келдің әз-Наурыз» атты концерттік бағдарламада қаланың би ұжымдары мен әншілері өнер көрсетті.

Той түнге ұласып, Парвиз Назаров, AYREE, Александр Филатов сынды әншілер қала жұртшыдығвның көңілін көтерді. Концерт соңын Қали Байжанова концерттік бірлестігінің солистері түйіндеді.

Әділет ШОПЕН.

Сообщение Теміртауда ұлыстың ұлы күні тойланды появились сначала на «ORTALYQ QAZAQSTAN» газеті.

Теміртау қаласындағы Тұң­ғыш Президенттің тарихи-мәдени орталығы қызметкерлері де Наурыз мерекесін жаңа форматта, яғни, қаламыздың жоғары оқу орны, колледж студенттері мен мектеп оқушылары арасында өткізді. Мереке бірнеше күндерге белгіленіп, ерекше тақырыпта атап өтілді. Ұсынылған мерекелік бағдарлама тақырыптары әртүрлі бағытты қамтыды. Ұлық мерекені тойлау 14 наурыз – Көрісу күнімен басталды. Наурыз мейрамы – көне дәстүр сабақтастығының белгісі саналатын, ұлттық мәдениетіміздің қайта түлеген ерекше мерекесі. Халық арасында бұл мереке ұлттық таным бойынша үйге жыл бойы молшылық пен сәттілік әкеледі деген сенім бар. Сол себепті, жыл басын ерекше қарсы алуға баса көңіл аударылды.

Бірінші күні Теміртау қаласының мектеп оқушыларымен «Шежіре күні» атты музей сабағы өтті. Ал, екінші күні «Қош келдің, әз Наурыз мейрамы!» атты тақырыппен Көрісу рәсімі ұйымдастырылды. Үшінші күні орталықтағы Наурыз тойы концерттік бағдарламаға ұласты.

Қазақстанда Наурызды тойлау дәстүрлері мен әдет-ғұрыптарымен таныстыру мақсатында өткен музей сабағы аясында қолөнер шеберлерімен кездесу қарастырылып, бірнеше ауылға бөлініп, орталық қызметкерлері шеберлік сабақтар өткізді. Олар «Дәстүрлер ауылы» – Наурыз меркесіндегі салт-дәстүрлер, «Шеберлер ауылы» – қолөнершілердің шеберлік сабағы, «Шымырлар ауылы» – ұлттық спорт түрлерінен сайыстар, «Наурыз-думан» – мерекелік салтанатты концерттік бағдарлама болды. Төртінші күні «Игілікті іс» атты қайырымдылық шарасымен жалғасты.

Орталық қызметкерлері наурыз көже, бауырсақ пісіріп, келушілерді ерекше көңіл-күймен қарсы алды. Наурыз көженің жасалу жолын қаламыздың аналар алқасы көрсетіп, қыздар мен ұлдар өз қолдарымен әшекей бұйымдар мен торсықтың жасалу жолдарын көріп, қызығушылық танытты.

Қызметкерлерінің көмегімен азық-түлік қоржыны жиналып, қаламыздың екі отбасына тарту жасалды. Мерекелік салтанаттан кейін қаламыздың ақсақалдар алқасы баталарын беріп, келушілерге ерекше ықыластарын білдірді. Ақсақалдар «Ұлыс оң болсын! Ақ мол болсын, қайда барса жол болсын!» – деп бата берді. Наурыздың айрықша тәлім-тәрбиелік, үлгі-өнегелік, сән-салтанаттық, мәрт-жомарттық, қадір-қасиеттілік нышан белгілері мен таным ұғымдарының үлгі түрлері өте көп болды.

Ләззат ДИХАНБАЕВА,
Тұңғыш Президенттің тарихи-мәдени орталығының ғылыми қызметкері.

Сообщение Жаңару мен жаңғыру появились сначала на «ORTALYQ QAZAQSTAN» газеті.

Азияның қақ ортасына бекіген атамекенімізге көз тікпеген жау жоқ. Төңіректің бәрі қызықты. Қызығатындай-ақ! Осы байтақ жерді көз алартқан жаудан қорғау үшін қазақ аттан түспеді. Батыр болады-ау деген баласына тұлым қойып, атқа отырғызды. Жылқымен бірге егіз етті. Кәрі құрлықтың ауыз әдебиетіндегі, мифологиясындағы жартылай адам, жартылай жылқы кентаврлар біз едік. Көзі ашық, көкірегі ояу, әділеттілікті ту еткен жаһан оқымыстылары мұны кейінде мойындап та жүр. Кәрі тарихты ақтарсаңыз, бұған дәлел көп. «Жылқы мінез қазағым» дейтін сөзді де естіп келеміз. Кейінгі мыңжылдықта алып құрлықты ат үстінде жүріп билеп-төстедік. Ұлттық спорт деп айдарлап қойған осы көкпар, бәйге, аударыспақ, теңге алу, жамбы ату секілді ойындарының негізгі миссиясы біреу ғана: күш-қуаты толысқан жігіттерді жауынгерлікке баулу. Бозбала асауға ауыздық тағып, мінезін, қайратын қайраған.

Мысалы, жамбы ату ойынында атпен шауып келе жатып, садақ ату керек. Жебені нысанаға дәл тигізу – басты шарты. Осы ойын қазақтың ұлан асыр тойында ұйымдастырылған. Тойдың сәні. Осы ойын жауынгерлікті, ептілікті шыңдайтыны сөзсіз. Әбден бапталған, күш-қуаты толысқан жүйріктің үстінде отырып, нысаны дәл көздеу – оңай іс емес, әлбетте. Тарихымызда жау әскерінен екі есе аз болса да, алыстан ұрыс салу тактикасымен жеңіске жеткен қолбасшыларымыз көп. Өзі көз ілеспес жылдамдықпен шауып келе жатса, бір уақытта жебені жаңбырша жаудырса, қандай қалың болса да, арғы беттегілер үшін оңайға соқпасы анық. Қазан атымен жүйткіген сарбазды сұлатып түсіру мүмкін емес-ау. Бір қарасаң сайдан, бір қарасаң төбеден шабады. Сәті келсе, найзасымен түйреп, қылышымен қиып өтеді. Алыстан шалма салып, дұшпанын сүйретіп те кетеді. Сүйреткені тірі қалса, «тіл» болуға да жарар. Әріге бармай-ақ, отты зеңбірегімен қазақ даласына лап берген орыс патшалығының жазалаушы әскерін жайратып салған Кенесары ханның ұрыс тактикасын есіңізге алыңыз. Қасым ханның баласы, Төле би бойынан Шыңғыс ханның отын көрген Абылай ханның немересі хан Кене!

Арқа ғана емес, Қазақстанның түпкір-түпкірінде жиі ұйымдастырылатын көкпардың да мазмұны – осы. Бүгінде дүниеге шыр етіп тізгін ұстары келсе, ауылдың мерейтойы болса және басқа да қызық, қуанышы болса көкпар ұйымдастыру сән. Жөн-ақ! Қазақ баласына бұдан асқан адреналин жоқ-ау сірә?! Бұлай болуы да заңды құбылыс. Өйткені, бұл қанға сіңген. Ұлттық код! Қиқуды естісек, жылы төсегімізден ұшып тұратынымыз бар. Ұран мен бойыңды шымырлатар қиқу санамызда жаңғырып тұр.

Жүйткіп келіп жерде жатқан серкені көтеріп алып, әрі қарай шабасың. Олжаңды тақымыңа басып, тұлпарыңды да тізгіндейсің. Астыңдағы жарап тұрған атың ойыңды қолыңның қимылынан-ақ ұғады. Бейне бір аяғындағы добынан айрылмай, қарсыласын алдаған футболшы дерсің. «Көкпар – Кентаврлардың футболы» деген өрелі қалжыңды естіп едік бір ақсақалдың аузынан.

Серкені тақымына басып, жан-жағын қаумалаған қарсыластан сытылып бара жатқан балуанға қарап тұрып, көз алдыңызға қан-қасап майданның ішінде жаудың туына қарай жүйіткіген батыр елестейді.

Аударыспақтың да, теңге алудың да, күрестің де маңызы – осындай! Күрес арқылы қоян-қолтық ұрысқа шыңдалған.

Бұл күнде атқа отырып, садақ атып, найза, қылышпен отан қорғай алмайсыз. Бұның бәрі өтіп кеткен мыңжылдықта қалды. Бірақ, мәселе бес қаруда емес. Мәселенің бәрі – жүректе, мінез бен намыста. Осының бәрін қазақ қалай шыңдау керек екенін жақсы білген.

Биылғы Наурыз мейрамында ұлттық ойындарымызды ұлықтап жатырмыз. Заман қанша жаңарса да, ұлықталуы тиіс. Қазақ баласының мінезі мен қайраты кетілмей, керісінше қайраулы болуы үшін керек.

PS: Тойшыл қазақ дегенді жиі айтамыз-ау! Қазақ тойының осындай да функциясы бар екенін ескерген жөн.

Ерік НАРЫН,
Ortalyq.kz

Сообщение Ат үстінде асқақтайды айбарым! появились сначала на «ORTALYQ QAZAQSTAN» газеті.

Алаңға жиналған халықты аудан басшылығы құттықтап, оларға Мәдениет үйінің өнерпаздары дайындаған мерекеге арналған сахналық қойылымдар көрсетілді. Бұдан кейін ұжымдар арасында өнер сайысы, «Наурыз-тілек» байқауы өтіп, аудандық кітапхананың балаларға арналған бағдарламасы ұсынылды.

Түске дейін қазақтың ұлттық ойындарынан жарыс өткізіліп, аудан көркемөнерпаздарының концерті болды.

Ал, түстен кейін мереке жалғасып, одан әрі ботақаралықтар қыздар мен жігіттер байқауы мен мерекелік отшашуды тамашалайтын болады.

Ержан ИМАШ,

Бұқар жырау ауданы.

Сообщение Ботақарада бұқара тойы появились сначала на «ORTALYQ QAZAQSTAN» газеті.

Бұл күні кенттің Мәдениет үйінің алдындағы алаңға 3 киіз үй тігіліп,жергілікті кәсіпкерлер сауда сөрелерін жайып тастап,мерекеге келген жұрт Наурыз көжеден,ыстық палау мен бауырсақтан дәм татысып жатты.

Жиналған жұртшылықты Абай ауданының әкімі Сәбит Оспанов, осындағы Жұмабек Тәшенов атындағы мешіттің бас имамы Мұрсали қажы,ауыл ақсақалдары мерекемен құттықтап,ән-күйге, ұлттық ойындар мен салт-дәстүр көріністеріне кезек берілді.

Наурыз тойына қатысқан үлкен-кіші арқан тартысу, жамбы атудан сайысқа түсіп, шаш өру, шашпау тағудан өзара бәсекелесті.Жарыс жеңімпаздарына ақшалай сыйлықтар мен дипломдар тапсырылды.

Концерттік бағдарламада топарлық және абайлық өнерпаздар өнер көрсетті. Олар халық әндері мен қазақ сазгерлерінің шығармаларын орындап,көпшілікке мерекелік көңіл-күй сыйлады.

Ержан ИМАШ,

Абай ауданы.

Сообщение Наурыз тойы Топарда да тойланды появились сначала на «ORTALYQ QAZAQSTAN» газеті.

Ұлыстың ұлы күні жиылған қауымды Қарқаралы ауданының әкімі Әділжан Арғынұлы құттықтады.

– Өздеріңізге мәлім, елімізде биыл Наурыз мерекесін атап өтуде жаңа тұжырымдама қабылданды. Ел Президенті Ұлттық құрылтайда Наурыз мерекесінің мәртебесін көтеріп, мазмұнын байытуымыз қажеттігін атап өтті. Осыған байланысты, Наурызнаманың жаңа тұжырымдамасы бекітіліп, 14 наурыз Амал күнінен бастап елімізде мерекелік шаралар өтіп жатыр. Осындай шаралар ауданымызда да ұйымдастырылуда. Наурызнама аясында қайырымдылық, мәдениет және салт-дәстүр күні, шаңырақ, ұлттық киім күні, жаңару, ұлттық спорт, ынтымақ, жыл басы, тазару күндері белгіленді. Ұлыстың Ұлы күні құтты болсын! Тәуелсіздігіміз баянды болып, еліміз өсіп-өркендей берсін! Әр шаңыраққа амандық, баянды бақыт, мол ырыс-дәулет пен толайым табыстар тілеймін,- деді аудан басшысы.

Ұлы думанға суырыпсалма ақындар да келген екен. Бақытжан Үйсінбаев пен Балдырған Жекееваның наурыз-айтысы көпшіліктің көңілін бір серпілтіп тастады.

Кейінгі жылдары дәстүрге айналған бір тамаша үрдіс – ақсақалдардың бата беру сайысы. Қарқаралыда небір аузы дуалы, сөзі уәлі үлкендеріміз бар. Сол кісілердің бірнешеуі көпшілікке әдемі сөз, әуезді үнімен бата арнағанда ұлтымыздың осы бір ұлағатты ғұрпына сүйінбеген, сүйсінбеген жан қалмады. Ал ақ жаулықты аналарымыз сахна төрінен «Беу, айдай», «Бір бала», «Сәулем-ай», «Әгугай» сынды халық әндерін төгілтті. Ардагерлердің «Қайран жастық» хоры орындаған «Шіркін-ай» мен «Илигай» әндері де көңілімізді толқытты.

Мерекелік көңіл күйдегі халайық әйгілі «Қара жорға» биін «Аңыз» би ансамблінің кәсіби бишілеріне қосыла билеп, бір жырғап қалды.

Әлімжан Мәкенов, Еркебұлан Уалханов, Нұрсұлтан Қасымбек, Аида Әбілқасымова, Баян Ахметова, Гүлмира Сламбеков, Қанат Мүслимов, Арай Құснитденова сынды әншілер мен өнерпаздар Қарқаралы жұртына керемет мерекелік көңіл-күй сыйлады.

Орталық саябақтың бір түкпірінде күрес, асық, садақ ату сынды ұлттық спорт түрлерінен бәсеке жүріп жатса, бір жерде жас аналар арасында бесік жырын орындаудан сайыс ұйымдастырылды. Мереке күнгі жарыстарға қатысқан жандар сыйлықсыз, марапатсыз қалған жоқ.

«Наурыз –Думан» театрландырылған мерекелік бағдарламасының аясында Қарқаралыдағы Өнер мектебінің, Мәди Бәпиұлы атындағы №44 орта мектептің, О.Жәутіков атындағы №1 орта мектептің, Ә.Ермеков атындағы №2 орта мектептің шәкірттері де арнайы дайындықпен келіп, халық алдында өнер көрсетті.

Қарқаралыдағы Наурыз тойы әлі де жалғасуда. Мерекелік демалыста жүрген көпшілік үшін мұның бәрі айтарлықтай сый, тамаша тарту болды. Наурыз құтты болсын, жаңа жыл халқымызға жаңа берекесімен келсін деп тілейміз.

Болатбек ӘШІМҰЛЫ,

Қарқаралы ауданы.

Сообщение Қасиетті Қарқаралыдағы Наурыз-Думан появились сначала на «ORTALYQ QAZAQSTAN» газеті.

Бір сағат ішінде балаларға «Асық ату», «Арқан тарту», ​​«Садақа ату» ойын алаңдары ұсынылып, фотоаймақтар ұйымдастырылып, театрландырылған көрініс әзірленіп, балалар ұлттық ойындар мен би биледі.

Мереке күндері 22-24 наурыз аралығында барлық мәдениет және өнер ұйымдарында кішкентай көрермендерге арналған қойылымдар көрсетіледі.

– Бұл шара қазақ халқының салт-дәстүрлерімен таныстыру мақсатында ұйымдастырылған. Халық шығармашылығына, оның әртүрлі жанрларына, стильдеріне деген қызығушылықты ояту көзделіп отыр. Халық фольклоры туралы білімдерін кеңейту. Алдағы уақытта да осы дәстүрден таймай, ұйымдастырып отырамыз. Мереке құтты болсын, – деді театр басшысы Гүлнәр Темірова.

Ерік НАРЫН,

Ortalyq.kz

Сообщение Наурыз мейрамына арналған қайырымдылық шарасы өтті появились сначала на «ORTALYQ QAZAQSTAN» газеті.

Аталған спорт кешені ұлттық сана мен құнтты құндылыққа, бай салт-дәстүрге барынша икемделген. TÚRAN-EL ат спорты орталығының алаңында таңғажайып табиғат аясында сәйгүлікті ерттеп, серуендей аласыз. Таңғы және кешкі астан ауыз тиіп, дәм тата аласыз. Саятшылық құрып, Сарыарқаның сайын даласының қадір-қасиетіне көз қанықтыра алатындай кең мүмкіндік қарастырылған. Бір қарағанда кемпинг қалыбында салынған орталықтың ішіне бас сұққаныңызда заманбап қалыпқа келгендей әсерде қаларыңыз рас. Барынша минимализм һәм ұлт иісі аңқып тұрған «қыз­дың жыйған жүгіндей» көркем бөлмелер бөлені де жарастыратын тәтті де тылсым аура сыйлайды. Қазақы нақыштағы әбзел мен бұйымға толы төр көздің жауын алады. Қабырғаға ілінген қазақтың үкілі домбырасы шабыт шақырады.

– Задында, Ұлттық спорт орталығы дегеніміз – бұл жай ғана дене шынықтыратын құралға лықа толы ғимарат кешені ғана емес. Бұл адамның шыңыраудағы арманы шындықпен шендесетін әрі осы саладағы һас таланттар мен болашақ чемпиондарға тұғыр беріп, ғұмыр қосатын қасиетті де қастерлі орын. Атамекеніміздің тап жүрегінде орналасқан осы қазыналы орталық спорттық бірегей жетістіктер мен биік белестерге қанаттандыратын нәмі бөлек нышан. Мұнымен қоса, аттың жалын тартып мінген қарапайым қаракөздеріміз дем алатын, өзге ұлт өкілдері мейман болып қазақы болмысымызбен етене танысатын жер, – деп ағынан жарылды спорт нысанының негізін қалаушы, белгілі кәсіпкер, меценат, «Natige» ЖШС директоры Ерлан Әшім.

Ордалы орталық аумағына келгенімізде көзімізге бірден құйрық жалы таралған сәйгүліктер көрінді. Ақалтеке, Қазақы, таза қанды, су төгілмес жорға, көкпар, бәйге аттардың 40 шақтысы қос жанарымыздың жауын алды. Қызығушылығы қыз-қыз қайнаған жасөспірімдер қарасы әсіре көп. Иә, жаһандану дәуірі ұлт пен ұлыс тұрмақ, тұтас өркениеттердің өзінің орнын алмадай алма кезек ауыстырып жатқан тұста қазақты қайтадан атқа отырғызу әсте оңай болмаса керек-ті. Қырға қырағы қарап, сөзін зерлі еткен зерделі ел бүгінде осындай оңды орындары арқылы мүмкіндігін молайтып, қазақы қалыбын сақтауға һарекет етуде. Ат үстінде атой салған көшпенді елдің ұланы тақымын тәсірлі етіп, қолына қыран қондыруды үйренеді бұл жерде. Алаштан келе жатқан алтын арқаудың өзегін жалғайды. Атқа ұлттық киім – аяққа саптама етік, үстіне шапан, басына бөрік киіп мінеді.

– Енді бұл бертінде ғана жаңадан ашылған ақшағаладай көркем жер қанында қырдың жыты бар ұланды үздіктіре кететіні сөзсіз. Ақзер әлемді ақпарат билеп тұрған кезеңде елге кеңінен насихат жұмысын қауырт бастап кеттік. Бізге алдымен жас жеткіншектердің келгені де маңызды. Аптаның әр күні үлкендермен қаз-қатар мектеп оқушылары келіп төл болмысымыз бен табиғат тынысын сезініп қайтады. Күніне шамамен 40-50 адам қарасын аңдайсыз осы арада. Ал, сенбі-жексенбі күні тіптен лықа толады. Түрлі туристік бағыттағы компания өкілдері де күніне 100 шақты турист әкеліп жатады. Сантүрлі форматтағы тимбилдинг ұйымдастырылады. Ұлттық құндылықтың қадір-қасиетін арттырып, салт-дәстүрімізді дәріптеу – басты мақсат, – дейді орталықтың SMM, маркетинг, туризм саласын ілгерілету жөніндегі маманы Мирас Төлеутай.

Әрмен қарай өте бергенімізде оқушылардың демалыс кезіне лайықталып жарақталған арнаулы жасөспірімдер лагері аумағына тап болдық. Лагерьдің мұраты демалысқа шыққан 9-15 жас аралығындағы шәкірт атаулысының денін жазып, еңбекке баулыту. Шаһардың маңында ауылдың атмосферасын тұла бойға сіңдіру. Мұнда бала біткен сәйгүліктің құйрық жалын тарайды. Дәріс алады. Қыс мезгілінде қар күрейді. Әсіресе, қаланың қағылез ұл-қыз­дары үшін бұл кәдімгідей «Эврика» болып тұр. Атты бірден тізгіндей алмағаны алдымен есекке мініп үйренеді. Әбзел мен ер-тұрман жарағын қос қолымен ұстап көреді. Тамырымен танысады. Ет мүшелеу, қазы тілу, төрт таспадан бастап қамшы мен бишік, жүген, тізгін-шылбыр өруге жаттығады. Лагерьдің уақыты – бір жұма.

– Өткен айда «Жорық» деген турға 20 шақты жасөспірім шықтық. Кемі 25 шақырымдық саятшылық құрып бой жаздық. Бір қызықтысы, аңға шығу тәртібінде қолға мылтық алынбайды, темір көлікке аяқ артпаймыз. Ат сайлап, тазы ерттік. Сонадайдан қылаңытқан аң атаулысына құс жіберіп, тазы салдық. Ілсе құс іледі, шалса тазы шалады. Заң жүзінде лицензия бар. Ал, бізден құтылған аңның қу жаны – өзіне олжа. Тиіспейміз! Ініне бас сұғып үлгергеніне де қауіп пен қатер жоқ. Қазір саят мезгілі аяқталды. Жазға салым аударыспақ, көкпар, теңге ілу сынды ұлт ойындарына лайықты етіп қажетті алаңдар құрылысы жабдықталу үстінде. Бұ кездің өзінде біздің қатарымыз­да үздік шығып жатқан, төбе көрсетіп төбелге айналып келе жатқан Наурызбай Батыр, Медеш Нұрәли сынды қанаттас қатарлас шәкірттер шығуда. Өзіміз де 15 жастан көкпар тартып, серкені жерден көтеріп жүрміз, – деп тұжырды сөзін шәкірт көкпаршы, саятшы, орталық түлегі Ақбар Қарығұл.

Қош, сонымен, байырғы қазақтың шатырына кіріп, Қазақстан мұсылмандары Діни басқармасы адал деп мөр қойған ұлтымыздың ет, қарынбүрме сынды маңызды дәмінен ауыз тиіп, қымызынан ұрттадық. Ат ерттеп, сайын даланың таңғажайып тылсымына көз жүгіртіп, құлақ түрдік. Қамшы ұстадық, садақтан сайкез оқ аттық. Екі тарлан бөрінің жотасын көрмесек те, атамекеніміздің көкжиекпен тұтасқан төбесінен құдды бір бата алғандай рәуіште қайттық бұл сапардан. Осындайда қасиетті жұртты табағынан табанына дейін қазақы нақышқа ораған елдің төбелдері мен қаймақ бетіне шығар игі-жақсыларына бір-бір ауыз алғыс та арқалатып үлгердік. Мәйекті мақала да осы бір риясыз оқиғаның жолжазбасындай болсын деген тілектен туған еді…

Ерқанат КЕҢЕСБЕКҰЛЫ,
Ortalyq.kz

Сообщение Тұранның тұрағындай тұғырлы алаң появились сначала на «ORTALYQ QAZAQSTAN» газеті.