Шахтинскте мемлекеттік санитариялық қызметтер электронды форматта көрсетілуде

Санитариялық қызметтің негізгі бағыттарының бірі – халыққа және кәсіпкерлерге мемлекеттік қызметтер көрсету болып табылады. Бұл қызметтер тікелей қауіпсіздікті қамтамасыз етуге және санитариялық нормалардың сақталуына байланысты.

Қазақстан Республикасының «Халық денсаулығы және денсаулық сақтау жүйесі туралы» Кодексіне сәйкес, мемлекеттік органдар халық денсаулығына әсер етуі мүмкін объектілерге бақылау жүргізеді. Мұндай барлық объектілер эпидемиологиялық маңыздылығы жоғары және маңыздылығы болмашы екі санатқа бөлінеді. Бұл бөлініс қадағалауды неғұрлым тиімді ұйымдастыруға және аса қауіпті салаларға ерекше назар аударуға мүмкіндік береді.

Эпидемиологиялық маңыздылығы жоғары объектілерге балабақшалар, мектептер, медициналық ұйымдар, қоғамдық тамақтанудың ірі объектілері, өнеркәсіптік кәсіпорындар және адамдардың қауіпсіздігімен тікелей байланысты басқа да ұйымдар жатады. Жұмысын бастамас бұрын мұндай объектілер санитариялық-эпидемиологиялық сараптамадан өтіп, белгіленген талаптарға сәйкестігін растайтын санитариялық-эпидемиологиялық қорытынды алуға міндетті.

Эпидемиологиялық маңыздылығы болмашы объектілерге шағын қоғамдық тамақтану кәсіпорындары, сауда нүктелері, базарлар, спорттық-сауықтыру объектілері және тәуекел деңгейі төмен басқа да ұйымдар жатады. Олар үшін қызметті бастау кезінде eGov.kz электрондық үкімет порталы арқылы хабарлама тәртібі қарастырылған, бұл қажетті бақылау деңгейін сақтай отырып бизнесті бастау процесін жеңілдетеді.

Қажетті рұқсаттар немесе хабарламалар болмаған жағдайда санитариялық қызметтің мемлекеттік органдары жедел әрекет ету шараларын қолдануға, оның ішінде бұзушылықтар жойылғанға дейін объектінің қызметін тоқтата тұруға құқылы. Бұл халық денсаулығын қорғауға және ықтимал қауіптердің алдын алуға бағытталған.

Санитариялық-эпидемиологиялық қорытындыларды беру тәртібі Қазақстан Республикасы Денсаулық сақтау министрінің № ҚР ДСМ-336/2020 бұйрығымен реттеледі. Онда қажетті құжаттар тізбесі, қарау мерзімдері, бас тарту негіздері және қызмет көрсету нәтижесі айқындалған. Осылайша, бұйрық санитариялық-эпидемиологиялық саламаттылық саласындағы мемлекеттік қызметтерді көрсету тәртібін толық регламенттейді.

Санитариялық-эпидемиологиялық қорытындыларға ерекше назар аударылады. Бұл құжат рұқсат беру сипатындағы құжат болып табылады және мерзімсіз беріледі. Ұйымның мекенжайы немесе атауы сияқты кейбір деректер өзгерген жағдайда, қайта зерттеу жүргізілмей-ақ оны қайта рәсімдеуге жол беріледі, бұл әкімшілік рәсімдерді жеңілдетеді.

Бұйрыққа енгізілген соңғы өзгерістер қызметтерді алу рәсімін жеңілдетті: кейбір құжаттар міндетті тізбеден алынып тасталды, себебі олар бойынша мәліметтер мемлекеттік органдарға ақпараттық жүйелер арқылы өздігінен түседі. Бұл үдерісті неғұрлым ыңғайлы әрі жылдам етті.

Бүгінгі күні Шахтинск қалалық санитариялық – эпидемиологиялық бақылау басқармасы үш негізгі мемлекеттік қызмет көрсетеді. Бірінші қызмет – эпидемиологиялық маңыздылығы жоғары объектілердің сәйкестігі туралы санитариялық-эпидемиологиялық қорытынды беру. Мұндай объектілер міндетті сараптамадан өтеді, нәтижесінде нормаларға сәйкес келген жағдайда қорытынды беріледі. Қызмет көрсету мерзімі – 13 жұмыс күні.

Екінші қызмет зиянды заттардың шығарындылары мен төгінділеріне, санитариялық-қорғау аймақтарына және жаңа өнім түрлеріне байланысты нормативтік құжаттар жобаларын келісуге қатысты. Бұл рәсімнің мақсаты – жоспарлау кезеңінде халық денсаулығы мен қоршаған ортаға теріс әсердің алдын алу. Қарау мерзімі 10 жұмыс күнін құрайды, нәтижесінде қорытынды немесе дәлелді бас тарту беріледі.

Үшінші қызмет – азық-түлік өнімдерін өндіру объектілеріне есептік нөмір беру. Бұл нөмір азық-түлік өнімдерін өндірумен және қайта өңдеумен айналысатын барлық кәсіпорындар үшін міндетті болып табылады және өнімді барлық кезеңдерде есепке алу мен бақылауды қамтамасыз етеді. Қызмет көрсету мерзімі – 5 жұмыс күні.

Барлық мемлекеттік қызметтер тек eGov.kz порталы арқылы электрондық форматта электрондық цифрлық қолтаңбаны пайдалана отырып көрсетіледі. Бұл азаматтар мен кәсіпкерлерге мемлекеттік органдарға жеке жүгінбей-ақ өтініш беруге, құжаттарды тіркеуге және қаралу мәртебесін қадағалауға мүмкіндік береді. Қызметтер өтеусіз негізде ұсынылады.

Ағымдағы жылдың бес айында басқарма 24 мемлекеттік қызмет көрсетті, оның ішінде 20 санитариялық-эпидемиологиялық қорытынды берілген, 3 қайта рәсімдеу және 1 дәлелді бас тарту тіркелген. Қызмет көрсету мерзімдерін бұзу жағдайлары тіркелмеген, өтініш берушілерден шағымдар түспеген.

Санитариялық – эпидемиологиялық бақылау – бұл формалдылық емес, халық денсаулығын қорғаудың маңызды жүйесі. Санитариялық нормаларды сақтау барлық субъектілердің міндеті және қоғам қауіпсіздігіне қосылған маңызды үлес болып табылады.

Санитариялық қызмет мамандары барлық мүдделі тұлғаларға әрқашан консультациялық және әдістемелік көмек көрсетуге дайын.

Мемлекеттік қызметтерді алу мәселелері бойынша 8(72156)50679 телефоны арқылы немесе Шахтинск қаласы, Ленинград көшесі, 81 мекенжайы бойынша хабарласуға болады.

 Г.ЖҰМАҒҰЛОВА
Шахтинск қалалық санитариялық-эпидемиологиялық бақылау басқармасы басшысының орынбасары