Шабысы – дүлдүл, дауысы – бұлбұл
Жуырда жерлесіміз, Тәттімбет атындағы Қарағанды өнер колледжінің білікті ұстазы, Қ.Байжанов атындағы концерттік бірлестіктің белгілі әншісі – Сержан МҰСАЙЫН Мәдениет және өнер саласындағы жоғары жетістіктері үшін ҚР Тұңғыш Президенті – Елбасы қоры сыйлығының лауреаты атанды. Осымен тоғызыншы рет тапсырылып отырған марапатқа Арқа өңірінен ат қосқан Сержан сері абыройымызды асырды.
Мәдениет пен өнер, білім мен ғылым салаларында жемісті еңбек етіп, өздерін мәдени, ғылыми орталарда таныта алған жастардың жетістіктерін мойындау, сондай-ақ, оларға қолдау көрсету мақсатында тағайындалған бұл сыйлыққа биыл еліміздің түкпір-түкпірінен 127 үміткерлер өтініш білдіріпті. Қор сыйлығын тағайындайтын комиссия 18-ін үздік деп тапқан. Солардың ішінде біздің бетке ұстар ұстаз, шабысы дүлдүл, дауысы бұлбұл Сержан Таранұлы бар.
Қордың биылғы сыйлығы бұйырған үміткерлер арасында «Астана Опера» мемлекеттік опера және балет театрының жетекші солисі Талғат Мұсабаев, Қ.Қуанышбаев атындағы Мемлекеттік академиялық қазақ музыкалық-драма театрының актері Сырым Қашқабаев, «Астана Опера» мемлекеттік балет және опера театры балет труппасының жетекші солисі Мәдина Басбаева, бүгінгі күні Қытайда өтіп жатқан «I am a singer» байқауына қатысып, жүлделі биіктен көрініп жатқан жас әнші Димаш Құдайбергенов сынды өнерлі жастар бар.
Бұл марапат тартылған мәртебе, артылған сенім деп білеміз.
Аққудың қанатына ән сабақтаған Сержандай күміс көмей әншінің өнеріне берілген шынайы баға осы болар.
Өнер адамының қоғамға сіңірген еңбегі ел аманда елеусіз қалмас.
Қуаныш құтты болсын!
Мирас АСАН.
