«Орталық» өңірлік қолбасшылығының 35 жылдығына арналған салтанатты концерт өтті
Қарағанды қаласының Достық үйінде Ұлттық ұланның «Орталық» өңірлік қолбасшылығының 35 жылдығына арналған мерекелік концерт өтті.
Шараға әскери бөлімнің жеке құрамы, ардагерлер, қала тұрғындары мен құрметті қонақтар қатысты. Салтанатты кеш бөлімнің тарихын, ерлікке толы жолын және жауынгерлердің Отан алдындағы адал қызметін насихаттауға арналды.
Концерт барысында әскери қызметшілер мен шығармашылық ұжымдар патриоттық әндер орындап, ұлттық билер биледі. Сонымен қатар, көрермендерге әскери оркестрдің орындауындағы музыкалық нөмірлер ұсынылды. Ардагерлер мен офицерлер сөз сөйлеп, бөлімнің өткені мен бүгіні жайлы естеліктерімен бөлісті. Олар қазіргі жас буынға ақ баталарын беріп, әскери борышқа адал болуға үндеді.
6800 әскери бөлімі – Ұлттық ұланның маңызды құрылымдарының бірі. 35 жыл ішінде бөлім қауіпсіздікті қамтамасыз етіп, қоғамдық тәртіпті сақтау жолында аянбай еңбек етіп келеді. Қазіргі таңда бөлім әскери даярлығы жоғары, тәртіпті әрі елге адал қызмет ететін жауынгерлерімен мақтана алады.
Мерекелік кеш соңында үздік қызметкерлер мен ардагерлер алғыс хаттармен, марапаттармен марапатталды.
Бұл кеш әскери бөлімнің мерейлі мерекесіне арналған ғана емес, патриоттық рухты көтеруге, бірлік пен ынтымақты нығайтуға бағытталған тағылымды шара болды.
