Облыс әкімінің гранты кімдерге беріледі?

Қарағанды облысында жергілікті бюджеттен білім гранттарын алуға құжаттарды қабылдау басталды. Биыл олардың 112-і педагогикалық және медициналық мамандықтарға бөлінді.

Е.Бөкетов атындағы Қарағанды университетіне бакалавриатқа 20 адам қабылданады. Мемлекеттік тапсырыс математика, химия, география, бастауыш сынып, АӘД, тілдер мен әдебиет мұғалімдерін, сондай-ақ педагог-дефектологтарды даярлауды қамтыған.

Құжаттар 5–10 тамыз аралығында қабылданады. Ниет білдірушілер Е.Бөкетов атындағы ҚарУ қабылдау комиссиясына жүгінуі қажет.

Медициналық мамандықтарға резидентура бойынша оқуға 92 орын беріледі: Қарағанды медицина университетінде – 79, Астана медицина университетінде – 13. Мемлекеттік тапсырыс сұраныстағы  мамандықтардан құралған: Акушерлік және гинекология, анестезиология және реаниматология, кардиология, неврология, нейрохирургия, жалпы хирургия, урология және андрология, офтальмология, оториноларингология, жұқпалы аурулар, неонатология, шұғыл медицина, педиатрия, терапия.

Резидентураға құжаттарды қабылдау 20–25 тамыз аралығында өтеді. Жоғары оқу орындарының қабылдау комиссиялары тілек білдірушілерді күтуде.

Білім беру гранттарын беру конкурстық негізде жүзеге асырылатын болады.

Материалды әзірлеген Аида РАХЫМҚҰЛОВА