Мереке қарсаңында тамақтан уланудың алдын алу шаралары

Мамыр мерекелері қарсаңында қала тұрғындарының табиғат аясында демалуы, пикник ұйымдастыруы және мерекелік дастарқан жаюы жиілейді. Осындай кезеңде тағамнан уланудың алдын алу, жеке гигиена талаптарын сақтау және табиғатта қауіпсіз демалу ережелерін ұстану аса маңызды. Себебі сапасыз немесе дұрыс сақталмаған тағам денсаулыққа айтарлықтай қауіп төндіруі мүмкін.

Тағамнан улану көбінесе сапасыз немесе дұрыс сақталмаған өнімдерді тұтыну нәтижесінде туындайды. Негізгі себептері — сақтау шарттарының бұзылуы, жарамдылық мерзімінің сақталмауы, сондай-ақ тағамды жеткіліксіз термиялық өңдеу.

Ерекше қауіпті тез бұзылатын өнімдер болып табылады, мысалы: ет, құс, балық, сүт өнімдері, майонез қосылған салаттар және бөлме температурасында ұзақ уақыт тұрған дайын тағамдар.

Мерекелік дастарқанға дайындық кезінде өнімдерді тек рұқсат етілген сауда орындарынан сатып алу маңызды, жарамдылық мерзіміне және сақтау жағдайына назар аудару қажет. Рұқсат етілмеген жерлерде дайындалған үй өнімдерін сатып алуға кеңес берілмейді.

Тағам дайындау кезінде тазалықты сақтау қажет. Қол, ас үй құралдары және жұмыс беттері мұқият жуылуы тиіс. Шикі және дайын өнімдер бөлек өңделуі керек, бұл ластанудың алдын алады. Жаңа дайындалған тағамды алдыңғы күннің қалдықтарымен араластыруға болмайды.

Термиялық өңдеуге ерекше назар аудару керек. Ет, құс және балық толық пісірілуі тиіс. Дайын тағамдарды тоңазытқыштан тыс ұзақ уақыт сақтауға болмайды.

Табиғатқа шыққанда өнімдерді сақтау жағдайларын алдын ала ойластыру қажет. Өзіңізбен бірге тез бұзылатын өнімдерді, құс етінен дайындалған тағамдарды, шала піскен жұмыртқаларды, сондай-ақ кремі бар кондитерлік өнімдерді алуға кеңес берілмейді, өйткені жылы ауа райында олар тез бұзылады.

Табиғатта тамақтану үшін бір рет қолданылатын ыдыстарды пайдалану ұсынылады. Ішуге және тамақ дайындауға тек қайнатылған немесе бөтелкедегі суды қолдану қажет.

Жеке гигиенаны сақтауды ұмытпаңыз. Табиғатта тамақ ішер алдында қолды өңдеу қажет, су болмаған жағдайда ылғалды гигиеналық майлықтарды немесе антисептикалық құралдарды пайдаланыңыз.

Ашық отта тағам дайындауға ерекше назар аудару қажет. Барлық тағамдар толықтай пісірілуі тиіс. Кәуап дайындау кезінде еттің дайын болғанына көз жеткізу маңызды: еттің бөлінетін сөлі қызғылт емес мөлдір түсті болуы керек. Шикі және дайын етке бір құралды қолдануға болмайды.

Сондай-ақ өнімдерді жәндіктерден қорғау маңызды, оларды жабық ыдыста немесе қаптамада сақтау қажет.

Табиғатта демалу кезінде кене мен жәндіктердің шағу қаупін де есте ұстау керек. Жабық киім кию, кенелер мен масалардан қорғайтын репелленттер қолдану, ал қайтып келген соң өзіңізді және балаларды міндетті түрде тексеру ұсынылады.

Балалардың тамақтануын ұйымдастыру кезінде ерекше сақтық таныту қажет, тек қауіпсіз өнімдерді пайдалану керек.

Егер тағамды тұтынғаннан кейін жүрек айну, құсу, іштің ауыруы, дене қызуының көтерілуі немесе әлсіздік сияқты белгілер пайда болса, дереу медициналық көмекке жүгіну қажет, өзін-өзі емдеумен айналысуға болмайды.

Құрметті тұрғындар! Демалыстың қауіпсіздігі әрқайсымыздың жауапкершілігімізге байланысты. Қарапайым санитариялық нормалар мен тағаммен жұмыс істеу ережелерін сақтау тағамнан улану қаупін айтарлықтай төмендетеді.

Өз денсаулықтарыңызды және жақындарыңыздың денсаулығын сақтаңыздар, алдын алу шараларын ұстаныңыздар және мамыр мерекелері қауіпсіз әрі жақсы көңіл-күймен өтсін.

С.ИРИСТАЕВ
Шахтинск қаласының Бас мемлекеттік санитариялық дәрігері