«Мен – бақытты ақынмын!»
Абай атындағы Мемлекеттік сыйлықтың иегері, абадан ақын Серік Ақсұңқарұлының рухты, отты өлеңдерін мәнерлеп оқу арқылы әдебиетке қадам басқан, өлеңге құштар ұрпақ өсіп келеді. Жылда ақынның туған күні қарсаңында қара өлең салтанат құратын дәстүр бар. Қарағанды жоғары гуманитарлық колледжінде өтетін дәстүрлі Серік Ақсұңқарұлы оқуларында биыл колледж студенттері бақ сынады. Бұл жолғы байқауға Ұлытау және Ақмола облысы мен Астана қаласының да жас өрендері қатысты.
Биыл ақын Серік Ақсұңқарұлы мерейлі белеске, яғни, 75 жасқа толып отыр. Сол себепті әуелі ақынның өлеңдері оқылып, әні шырқалды. Қадірменді қонақтар қауымы мерейтой иесіне ыстық ықыластарын жеткізді.
Облыстың білім басқармасы басшысының орынбасары Алма Шалабаева, Қазақстанның еңбек сіңірген қайраткері Рымбала Кенжебалақызы, профессор, Қазақстанның мәдениет қайраткері Қойлыбай Асан, Қазақстанның еңбек сіңірген қайраткері, ардагер ұстаз Есжан Әміров, ақындар Серік Сағынтай, Руслан Нұрбай, Кеншілер мәдениет сарайының директоры Саят Әбдіғали жылы лебіздерін білдіріп, жас өрендерге сәттілік тіледі.
Ал Қазақстан Жазушылар одағының Қарағанды облысындағы өкілі Жанат Жаңқашұлы ақынның иығына шапан жауып, құрмет көрсетті.
– Бұл дәстүрлі шараның 10 жылдан астам тарихы бар. Бүгінде ұйымдастыруды облыстық білім басқармасының жоспарына сәйкес облыстық әдістемелік кеңес қолға алған. Кейінгі бірнеше жылда байқаудың беделі де, деңгейі де жоғарылады. Бұған өте қуаныштымыз! Серік Ақсұңқарұлының өлеңдерін екінің бірі түсіне бермейді. Өлеңдері – өте мазмұнды, мағыналы. Кейде екі-үш рет қайталап оқуға тура келеді. Бүгінгі байқауға келгендердің қарасы қалың екен. Соны көріп көңіліміз жадырап тұр. Серік Ақсұңқарұлының өлеңдері жас ұрпақтың тәрбиесіне ауадай қажет. Өйткені, ақынның шығармашылығында ұлттық рух бар, – деді белгілі сазгер, кеш қонағы Есжан Әміров.
Қарағанды жоғары гуманитарлық колледжі студенттері ақын өлеңдерін жатқа оқып, «Адам ата – Һауа ана» поэмасы бойынша қойылым ұсынды. Мұнымен қоса, колледждің хор ұжымы ақын сөзіне жазылған «Нұркеннің қырандары», «Мәңгілік ел» әндерін орындап, әнші Әлімжан Макенов «Шайтанкөл – аққулар мекені» әнін әуелетті.
Мерейтой иесі Серік Ақсұңқарұлы кейінгі жазған өлеңдерін оқып, ұйымдастырушыларға бас иіп, алғыс айтты.
– Гуманитарлық колледж 20 жылдың ішінде Қарағандыдағы үлкен рухани орталыққа айналды. Жыл сайын менің оқуларымды өткізіп келесіздер. Басқа да ақындардың кеші өтті. Бейбітшілік гүлзарында Пушкиннің ескерткіші тұр. Менің атыма арнайы кабинет те бердіңіздер. Мен – өте бақытты ақынмын, – деп ағынан жарылды.
Байқау үш аталым бойынша өтті. «Аруы адамзаттың – өлең деген!» аталымында оқушылар ақынның өлеңін мәнерлеп, шебер оқуы шарт. Осы үдеден Ж.Мусин атындағы Көкшетау жоғары қазақ педагогикалық колледжінің студенті Азамат Маратбек шығып, жеңімпаз атанды. Ал, «Мен – һас сақтың қара өлеңі…» атты аталымда Қарағанды «Bolashaq» жоғары колледжінің студенті Еламан Кенжебайдың еркін тақырыптағы өлеңдері қазылар көңілінен шығып, жеңімпаз деп танылды. «Жүрекке жақын әндер» аталымында ақынның сөзіне жазылған әнді шырқау керек. Тәттімбет атындағы Қарағанды өнер колледжінің студенті Алтынбек Жиенбаевтың орындау шеберлігі оң бағаланып, қатарластарынан қара үзді.
Өңірлік дәстүрлі Серік Ақсұңқарұлы атындағы оқуды өткізуге мұрындық болған Қарағанды облысында білім беруді дамытудың оқу-әдістемелік орталығының директоры Бақытгүл Әбдікерова жеңімпаздарды құттықтап, марапат тапсырды.
– Қазақ поэзиясының ірі өкілі, Абай атындағы мемлекеттік сыйлықтың иегері Серік ағаның дәстүрлі оқулары өтуде. Және туған күніңізбен тұспа-тұс келіп отыр. Сіздің өлеңіңізді оқыған біздің оқушыларымыз рухтанып, еліне, жеріне, ата-анасына деген сүйіспеншіліктері артатыны сөзсіз. Өлеңдеріңізді бірнеше рет оқимыз. Мәнін, маңызын түсіну үшін. Ақтоғай топырағында жаралып, Қарқаралыдан тамырын тереңге жайып, қазір елге белгілі рухты ақын болдыңыз. Өлеңдеріңізде ұлттық мұрат, ұлттық мүдде үнемі бірінші орында тұрады, – деді Бақытгүл Әбдікерова.
Жүлдегерлерге Алғыс хат пен «Qasym» баспа үйінің кітабы табысталды. Колледж директорының орынбасары Дархан Исатаев меймандарға алғыс білдірді. Келер жылы бұл оқуларды республикалық деңгейде өткізу жоспарда барын айтып, сүйіншіледі.
Қасымхан БҮРКІТҰЛЫ,
«Ortalyq Qazaqstan»
Сурет ұйымдастырушылардан
