Ұлттық дәстүрді насихаттайтын акция басталды
Республика күніне орай елімізде «Қазақ рухы» акциясы бастау алды. Жаңаша жаңғыруды көздеген қарағандылық жастар қазақы киімдер мен ұлттық дәстүрді насихаттайтын акцияға өзіндік үлес қосуда.
Әлеуметтік желіде белсенді жалғасқан акцияда жастар Мемлекет басшысының сөзін бейнежазбаға қойып, қазақша стиль туралы ойын, әшекейлерге қызығушылығын, дәстүрлердің жаңғыруы жөнінде жазба қалдыруда. Ұлттық киіммен, әшекеймен түскен суреттерін жариялап, дәстүрді әдемі насихаттауда.
– Жастардың басым көпшілігі әлеуметтік желіде отырады. Сондықтан, өзіміздің ұлттық мерекені әлеуметтік желіде әдемі жазбалар арқылы қолдауды көздедік. Жаңғырудың ең басты шарты – ұлттық мерекемізді ұлықтай отырып, патриоттық сезімді ояту. Бойымызда ұлттық код, мәдениет сақталмаса, ешқандай жаңғыру жоқ. Сондықтан, қазіргі таңда облыс жастары бұл акцияға белсенді қатысуда, – дейді «Жастар Рухы» жастар қанаты облыстық филиалының өкілі Арафат Мәжитов.
Акцияға бүгінде #KAZAKHRUHY хэштегі арқылы 25 қарағандылық жас қатысып үлгерді.
Аида РАХЫМҚҰЛОВА,
Ortalyq.kz
