ІІМ студенттер мен жоғары сынып оқушыларын жазда жұмысқа алған кәсіпорындарды ынталандыруды ұсынды
Ішкі істер вице-министрі Игорь Лепеха студенттер мен жоғары сынып оқушыларын жазғы демалыс кезінде жұмысқа тартқан кәсіпорындарға жеңілдік беруді ұсынды, деп хабарлайды ortalyq.kz ҚазАқпарат сайтына сілтеме жасап.
– Кәмелетке толмағандар арасындағы қылмыстың негізгі себептерінің бірі – жұмысы жоқтық пен бос уақыттың көптігі. Тәжірибе көрсетіп отыр, қылмыс жасаған жасөсіпірмдердің жартысынан астамы еш жерде оқымаған және еш жерде жұмыс істемеген, – деді ол.
Вице-министр ауыл жастарының арасында бұл мәселе тіптен өзекті екенін айтады.
– Ауылда жастардың дамуына, бос уақытын өткізетін шараларды ұйымдастыруға жағдай жасау қажет. Бұл проблеманы шешудің бір жолы – жазғы демалыс кезінде студенттер мен жоғары сынып оқушыларын жұмысқа тартқан кәсіпорындарға жеңілдіктер ұсыну бола алар еді. Бұл шара жасөспірімдердің бос уақытын тиімді өткізуіне септігін тигізіп, жастардың әрекетін дұрыс арнаға бағыттайды, – деді Игорь Лепеха.
