«Елге елеулі өзгеріс үшін…»
Қарағанды қаласындағы №61 Референдум учаскесінде қас қарайса да белсенділік бар. Біз бұл учаскеден облыстық мәслихат депутаты, спорт жанашыры Ерден Халилин мырзаны кезіктіріп қалдық.
– Елімізде атом электр стансасы құрылысына қатысты референдум өте белсенді өтіп жатыр. Тәуелсіз еліміздің азаматы ретінде, мен де өз таңдауымды жасап, дауыс бердім. Бұл – ел тарихындағы үлкен өзгерістің алғашқы қадамы. Әлемнің алдыңғы қатарлы елдерімен тең болып, ішкі-сыртқы экономикамыздың, білім мен ғылымның дамуы жолында Еліміздің болашағы үшін жасалған нақты қадам деп білемін, – дейді Ерден Балтабайұлы.
Аталған учаскеге тиістілердің жасы үлкені де, кішісі де қалыс қалмай, жарқын болашақтары үшін уақытын қиып, таңдауларын жасауда. Осылайша, маңызды міндетке жүйелі жауапкершілік танытты.
Қасымхан БҮРКІТҰЛЫ
