Бас редакторлар бас қосты
3 ақпан күні «Бас редакторлар клубы» республикалық қоғамдық бірлестігінің есеп беру-сайлау конференциясы өтті. «Бас редакторлар Клубы» – 2007 жылы құрылған, құрамына Қазақстанның 250-ден астам бұқаралық ақпарат құралының бас редакторлары мен жетекшілері кіретін ерікті қоғамдық бірлестік. Клубтың негізгі мақсаты – мемлекеттегі шығармашылық ахуалды нығайту, бұқаралық ақпарат құралдары арасында тиімді бәсекелестікті күшейту, қоғамда ұлтаралық келісім мен тұрақтылықты нығайту.
Конференция барысында Клубтың құрылған күнінен бастап атқарған жұмысына шолу жасалып, есепті кезеңде ұйымдастырған іс-шаралар туралы белгілі журналист, медиаменеджер, ҚР Парламенті Сенатының депутаты, Ұлттық Құрылтай төрағасының орынбасары, «Бас редакторлар клубы» қоғамдық бірлестігінің президенті Бибігүл Жексенбай баяндады. Басқосуға қатысқан әріптестердің сұрақтарына жауап қайтарып, клуб мүшелерінің ұсыныс-пікірлері тыңдалды.
Есеп беру-сайлау конференциясы соңында қоғамдық бірлестіктің жаңа құрамдағы басқарма мүшелері мен жаңа атқарушы директоры сайланды. Бас редакторлар клубының президенті болып Бибігүл Жексенбай қайтадан сайланып, клубтың атқарушы директоры болып Халықаралық Телевидение және радио академиясының академигі, белгілі журналист Махат Садықтың кандидатурасы бірауыздан қолдау тапты.
«Бас редакторлар клубы» қоғамдық бірлестігінің жаңа құрамдағы басқарма мүшелері – вице президенттері:
1. Мұратбек Тоқтағазин – Республикалық «Әділет. Рухани жаңғыру» газетінің бас редакторы, профессор;
2. Ысқақ Егембердиев – «Айқын-Литер» ЖШС директоры, Phd доктор ;
3. Қамбар Ахметов – журналист, «Қазақ газеттері» ЖШС бас директорының орынбасары;
4. Марат Башимов – қоғам қайраткері, «Человек и закон» газетінің бас редакторы;
5. Доған Йылдыз – журналист, «kazaknews.kz» және «kazakistan.kz» ақпараттық агенттіктерінің жетекшісі.
Конференция жұмысы барысында ҚР Ақпарат және қоғамдық даму министрлігінің Ақпарат комитетінің төрағасы міндетін атқарушы Нұрлыбек Жеңісбекұлы сөз сөйлеп, ақпараттық кеңістікте әріптестікпен жұмыс істеуге дайын екендіктерін білдірді.
ortalyq.kz
