Бұрқасын, 21 градусқа дейін аяз: демалыс күндеріне ауа райы болжамы жарияланды
«Қазгидромет» РМК мәліметінше, 2-4 желтоқсан аралығындағы күн райы болжамы белсенді Атлантикалық циклон жырасымен және онымен байланысты атмосфералық фронтальды бөліктердің әсерінен Қазақстанның басым бөлігінде жауын-шашынды (жаңбыр, қар) болады.
3 желтоқсанда – солтүстік-батыста және солтүстікте, 3-4 желтоқсанда – шығыста, 4 желтоқсанда еліміздің оңтүстік-шығысындағы таулы аудандарда қатты жауын-шашын болжанады. Республиканың солтүстік жартысында жауын-шашынмен қатар көктайғақ пен бұрқасын күтіледі.
Ел бойынша тұман, 15-29 м/с екпінде жел болжанады. Солтүстік-батыс пен солтүстікте желдің жылдамдығы кей уақытта 30 м/с және одан жоғары болады.
4 желтоқсаннан бастап солтүстік-батыс антициклонының жотасымен суық ауа массалары енеді. Бұл Қазақстанның басым бөлігінде температураның күрт төмендеуіне әкеледі. Солтүстік-батыс және солтүстікте түнгі сағаттарда 7-21 градус аязға дейін, ал орталық пен шығыста 5-15 градус аязға дейін төмендейді. Оңтүстік өңірлерде 0-5 градус аязға дейін болжанады.
Материалды әзірлеген Аида РАХЫМҚҰЛОВА
