«Арай-2023» алауын тұтатпақ

Тамыздың 16-18-і аралығында Қарағандыда облысқа қарасты қала спортшылары арасында «Арай-2023» ХVІ облыстық жазғы спратакиадасы өтеді.

Бұқаралық және ұлттық спорт түрлерін дамыту, тұрғындар арасында салауатты өмір салтын қалыптастыру, облыс қалалары арасында үздік спортшыларды анықтау мақсатында өтетін байрақты бәсекеде қатысушылар волейбол, шағын футбол, асық ату, армрестлинг, пауэрлифтинг, президенттік көпсайыс, жеңіл атлетика, шахмат, дойбы, тоғызқұмалақ, қазақ күресі және үстел теннисі сынды спорттың 12 түрінен бақ сынамақ.

Спартакиадаға облыстың Қарағанды, Теміртау, Балқаш, Приозерск, Саран, Шахтинск қалаларынан 600-ге жуық спортшы қатысады деп жоспарлануда.

Осы жылдың басты спорттық оқиғасы саналатын спратакиаданың салтанатты ашылуы 16 тамыз, сағат 20.00-де Орталық саябақтағы стационарлық сахнада өтеді. Шараның құрметті қонақтары ҚР Мәдениет және спорт министрлігінің амбассадоры, үлкен күш иесі Сергей Цырульников, Қарағанды қаласының үздік «Мозаик Лайф Бэнд» тобы.

Спартакиадаға облыс қалаларында кемінде 1 жылдан бері тұратын 18 жасқа толған және одан да ересек спортшылар қатыса алады.

Жарыстың жеңімпаздары мен жүлдегерлері кубоктармен, медальдармен, дипломдармен және мадақтамалармен марапатталады.

Ілияс ДҮНГЕНБАЙҰЛЫ,
Ortalyq.kz