Орынбай ауылында дауыс берушілер 70-ке жуықтады

Жаңаарқа ауданы, Орынбай ауылында да сайлау санитарлық талапқа сай өтуде.

– Үміткерлер осы уақытқа дейін үгіт-насихат жұмыстарын жүйелі жүргізді. Енді таңдау халық еншісінде. Дауыс берушілердің белсенділігі сонша, тіпті кезекте тұр. Себебі, карантин талаптарын қатаң сақтау — негізгі мақсат, — дейді 565 сайлау учаскесінің комиссия төрағасы Ертай Молдабеков.

Алғашқы болып дауыс берген ауыл ақсақалы Ерден Ташмағанбетовке сыйлық табысталды. Ақсақал да үміткерлерге ақ батасын беріп, сайлаудың сәтті өтуін тіледі. 

— Үміткерлердің жолы ақ болсын. Ауыл ажары арта берсін, базары тарқамасын. Бұл маңызды сайлау мен үшін. Халықпен санасқан өте дұрыс, — деп ағынан жарылды ауыл ақсақалы.

Дауыс беру аяқталғаннан және дауыстарды санағаннан кейін сайлау қорытындылары үш күн ішінде шығарылуы тиіс. 

Ауыл әкімдері төрт жылға сайланады.

Қасымхан ҒАЛЫМ.