Приозерск қаласында жаңа саябақтың құрылысы басталды

Приозерск қаласында болашақ саябаққа арналған алаңды тазарту, қалпына келтіру жұмыстары жүргізілді. Жақында қылқан жапырақты ағаштарды отырғызу басталады.

Саябақтың кеңістігі бірнеше бөлікке бөлінеді: демалыс аймағы, кәсіпкерлерге арналған аймақ және концерттер өткізуге арналған үлкен сахна. Кіреберіс бөлігі аркамен безендіріліп, ұлы ақын Абай Құнанбаевқа ескерткіш орнатылады. Саябақтың ауданы 2,2 гектарды құрайды. 

– Бүгінгі таңда саябақ аумағын қалпына келтіру жұмыстары аяқталды. Келесі кезеңде ұзындығы 2 мың метрден асатын суару жүйесінің құбырларын төсеу қолға алынады. Сонымен қоса, саябақта қылқан жапырақты және басқа да ағаштарды ішінара отырғызу басталады, – деді қала әкімі Сапар Сатаев. – Саябақ үшін біз қала орталығындағы, Абай көшесіндегі бос жерді таңдадық, сондықтан ол ақынның атын иеленуі тиіс. Бұдан бөлек, болашақта Приозерск қаласындағы стадионды жөндеуді жоспарлап отырмыз.

Облыс әкімдігінің баспасөз қызметі.