Осакаров ауданының мектеп оқушылары «Бұйратау» ұлттық паркі қызметкерлерінің жетекшілігімен тұқымнан ағаш өсірмек.
«Таза Қазақстан» және «Саябақтар маршы» экологиялық бастамалары аясында «Ағаш егу – табиғатты сақтау» акциясы өтті.
Молодёжный кенті мен Жансары ауылының оқушылары құмыраларға 500-ге жуық шаған мен қайың тұқымын екті. Олар ағаш өсіру – әр кезеңді назарда ұстап, қамқорлықты қажет ететін ұзақ әрі күрделі процесс екеніне көз жеткізді. Балалар өз көшеттерін үлкен және мықты ағаштар болып өсуі үшін қадағалап отыруға уәде берді.
– «Таза Қазақстан» республикалық акциясы жас ұрпақ үшін өзекті, – деп атап өтті Молодёжный кентінің Қаныш Сәтпаев атындағы тірек мектебінің директоры Айгүл Елшина. – Балалар өз елді мекендерін көгалдандыру мен абаттандыруға белсенді қатыса алады, сондай-ақ іс жүзінде туған өлкесінің табиғатына қамқорлық жасаудың қаншалықты маңызды екенін түсіне алады.
Акция Қазақстан Республикасы Президентінің екі миллиард ағаш егу жөніндегі тапсырмасын іске асыру шеңберінде өткізілді. Негізгі мақсат – жастар мен жергілікті тұрғындарды қоршаған ортаны қорғау мәселелеріне тарту, сондай-ақ ұлттық саябаққа нақты көмек көрсету.
– Біз әлі де көптеген іс-шаралар өткіземіз деп жоспарлап отырмыз: көшеттер егу, экологиялық сенбіліктер, бұлақтарды тазалау, сондай-ақ оқушылар, студенттер мен жергілікті тұрғындар үшін дәрістер, викториналар мен экосабақтар өткізу көзделген, – дейді «Бұйратау» МҰТП туризм және экологиялық ағарту бөлімінің бастығы Мария Редько. – Олардың барлығы туған өлкенің табиғи және мәдени мұрасына деген мақтаныш сезімін оятуға бағытталған.
Көктемде көшеттер тиісті жерлерге егіледі, ал оқушылар оларға күтім жасауды жалғастырады.
