Халықтың «Туған жерге туың тік» сөзін осындай игілікті шаруаға айналдырғалы шалғайдағы ауылдар біршама жанданып келеді. Соның бір дәлелі – Нілдідегі мына көпір. Ауыл ортасын қақ жарып өтетін терең жыра бар. Соған тартылған бұл өткелден кісі өтуі мұң еді. Күндіздің өзінде үлкен кісілерді бір адам қолтықтап өткізбесе, арасындағы апандай-апандай үңгірлерге түсіп кетсе, мертігіп, жазым болардай-тын. Түнде тіптен қауіпті. Жасы келген кісі былай тұрсын, жастардың өзі еңбектеп жүріп зорға өтеді кеш қарая. Ескі өткелдің қай уақытта салынғаны белгісіз, содан бері жөндеу көрмеген болуы керек. Биыл аталған ауылдағы Сәкен орта мектебін бітіргендеріне жиырма жыл толған түлектер – ауыл тумалары қосылып, ескі өткелді алып тастап, орнына жаңа көпір тартып берді. Терең жыраның екі жақ шетіне мықтап берік орнатылған ұзын өткелдің көркіне көз тояды. Әрі бір жақ басына баған орнатып, жарығы мол шам тартылған. Осының бәрін қолға алып, жүзеге асырушылар – Сәкен орта мектебін 1999 жылы бітірген түлектерге ауыл тұрғындарынң алғысы шексіз.

Білуімізше, көпір салғанның сауабы да мол. Әрбір орнатылған көпірден қанша адам өтсе, оны салған адамға екі еселеп сауап жазылады. «Сондықтан, ауылының ертеңін ойлайтын мұндай жастары бар қонысымыздың болашағы жарқын екен» десіп, үлкендер жағы көпірдің ашылуында азаматтарға баталарын берді.

Аталған ауылда «Туған жер» бағдарламасы аясында атқарылған екінші бір маңызды шаруа – жаңадан ашылған «Жастар» саябағы. Саябақ осындағы Сәкен орта мектебін бітіргендеріне 30, 40 жыл толғандардың бірігіп тындырған істерінің нәтижесі. Тойғанынан қалғанын туған ауылына жұмсап жатқан түлектердің әрқайсы – елінің нағыз патриоты. Отбасынан артылғанын Отанының бос орнына кірпіш қылып қалағаны осы емес пе? Мектеп жанында бос тұрған қоршаулы алаңнан орын тепкен саябаққа шырша-қарағайлар отырғызылып, арнайы демалып отыратын орындықтар қойылған. Ортасында үлкен субұрқақ бар. Бір жақ шетінен орын тепкен сахна да саябақтың көркін кіргізіп тұр. Жарығы мол шамдармен қамтамасыз етілген әрі сәнді қоршалған бұл жер енді ауыл жастарының бір соқпай өтпейтін орнына айналары сөзсіз. Қорыта айтқанда, Бейімбет Майлиннің «гүлденсе ауыл – гүлденеміз бәріміз» сөзі еске түседі. «Ат айналып қазығын табады» деген қазақтың сөзі ақиқатқа айналып, туған жерден шалғай қалаларда тұрып жатқан ауыл азаматтары елге қарайласып жатыр. Ұзағынан сүйіндірсін!

Гүлназ РЫМҚҰЛҚЫЗЫ,

Сәкен орта мектебінің тарих пәні мұғалімі. ШЕТ ауданы.

Сообщение Түлектердің тартуы – туған жерге появились сначала на «ORTALYQ QAZAQSTAN» газеті.

– Мектепте Елбасының «Болашаққа бағдар: рухани жаңғыру» бағдарламасына сәйкес, «Оқу шаттығы» жобасы аясында құрылған «Жыр-Жалын» поэзия отауы жұмыс істейді. Жетекшісі – Аңсаған Қазиева. Қалалық білім бөлімі жоспары бойынша ұйымдастырылған кештің мақсаты – жергілікті ақын-жазушыларды ардақтау, шығармашылығын насихаттау және жас буынды отансүйгіштікке тәрбиелеу, – деді қалалық білім бөлімі әдіскері Гүлназ Бекетқызы.

Шара басында білім ошағында «Туған жер» бағдарламасы негізінде, ашылған «Жыр-Жалын» поэзия залының тұсауы кесілді. Бұл мәртебеге мектеп басшысы Қайрат Кенжеғали мен ақын Серік Ақсұңқарұлы ие болып, ұстаздардың ерен еңбегіне алғыс айтты. Оқушылар залда портреттері ілінген Қарағанды облысы аумағынан түлеп ұшып, елімізге танылған ақын-жазушылармен қысқаша таныстырды.

– Қайрат – менің рухани шәкіртім. Баяғыдан көз салып жүрем. Өзіндік беті бар, өлеңі бөлек. Жүріс-тұрысынан поэзия үшін жаратылған жан екендігін байқаймын. Қазақтың талантты ақындарының бірі, – деп ерекше атап өтті Серік Ақсұңқарұлы.

Салтанатты сәттен кейін басталған кездесу кешінің шымылдығы Астанадан келген ұстаз, ғалым Ернат Қашқыновтың құттықтауымен түрілді. «Жыр-Жалын» поэзия отауының мүшелері шайырдың «Ей, ақындар! Ортаңнан жол ашыңдар» атты өлеңіне сахналық көрініс қойды. Қайрат ақынның ролін сомдаған балақай жұртты сүйсінтті. Мектеп оқушылары мың бұрала ұлттық би билеп, ақынды сахнаға жайғастырды. Кеш иесі жайлы көрсетілген бейнетаспа да әсерлі шықты. Ендігі кезекте мектеп оқушылары ақынның жырларын тебірене оқып, жұртты ерекше әсерге бөледі. Арқаның күміскөмей әншілері Ербол Алшынбай мен «Қуаныш-Гүлзар» дуэті ақын сөзіне жазылған лирикалық әндерді сызылта орындап, тыңдарманның құлақ құрышын қандырды.

Кештің бас кейіпкері Қайрат Асқар өз жырларын жеріне жеткізе оқып, жүректерге поэзия нұрын құйды.

– «Алаш анатомиясы» атты өлеңімді Мұхтар Мағауин ұнатып, «Жұлдыз» журналына басты. Өмірдегі ұстазым – Мұхтар Әуезовтен дәріс алған атақты Ләззат Бәйішева. Көп уақытымды босқа өткізіп алдым. Бала тәрбиесі жайлы сұрақ қиындау, өзімді тәрбиелейтін адам керек, – деп жұртты ду күлдіріп, ағынан жарылды ақын қойылған сауалға жауап беру сәтінде.

Шараны ұйымдастырушылар шайырға құрмет көрсетіп, иығына шапан жапты. Естелікке фотоға түсіп, қолтаңба алды. Ақынның өлеңіне жазылған «Сарыарқа» әні әуелеп, кеш мәресіне жетті.

Дауыс

Сәби туса жаны пәк, ойында арай,
Сыйлайтынын сезбейді ғұмыр қайғы.
Заңдылықты ешқандай мойындамай,
Азаттық деп, шындық деп шырылдайды.

Біз Дауысты жүрекпен түйсінбейміз,
Ал, бейғамдық – адамға талайғы жау.
Шырылдаса нәресте, сүйсінбей біз,
Тыныштықты бұзды деп қараймыз-ау.

Сәби сынды қорғансыз, гүл халыққа,
Күз боп ызғар шашамыз үлкендікпен.
Өмір сосын өтеді бір қалыпты
Тыныштықты бұза алмай жүргендіктен.

Жәлел ШАЛҚАР

Сообщение Ақжүрек ақынмен кездесу появились сначала на «ORTALYQ QAZAQSTAN» газеті.