Балабақшаның ашылу салтанатына кент әкімі Қайырғали Садықов, аудандық білім бөлімінің басшысы Елдос Смағұл арнайы қатысты.

– Балалардың толыққанды қалыптасуы үшін мектепке дейінгі білім беру нысандарының маңызы зор. Болашақ ұрпақтың тәрбиесі алдымен балабақшадан басталады. Мейрам ағамыздың ауыл бүлдіршіндерін қолдаудағы бұл қадамы басқаға өнеге болса, нұр үстіне нұр. Әрі жергілікті тұрғындар да жұмыспен қамтылды – дейді балабақша тәрбиешілері.

Аида РАХЫМҚҰЛОВА,
Ortalyq.kz

Сообщение Ауылдастарының қамын ойлаған кәсіпкер балабақша салып берді появились сначала на «ORTALYQ QAZAQSTAN» газеті.

Ақжалда төрт мыңнан аса халық тұрады. Тұрғындар санының өзі-ақ кенттің аумағының үлкендігін білдіргендей. Міне, осы кент орталығындағы Сәкен Сейфуллин көшесі мүлде тозып кеткен еді. Жүрген көліктің жүрісі кедергі келтірер ой-шұңқырлар көп-тұғын. Жақында осы мәселе біржақты шешілді. Ұзындығы бір шақырымға жуық көшенің ескі асфальт төсеніші қырып тасталып, жаңадан асфальт төселді.

Балқаштық мердігер «Тастемір» жол құрылысы кәсіпорны жұмысты бір айда бітірді. Жолдың екі жағына бордюр салынып, әктелді. Енді асфальт бетінде жолақ белгілер сызылмақшы.

Тамаша көше салып берген «Тастемірдің» темірдей жігіттері мен кәсіпорын басшысы Марат Жұмалиевке ақжалдықтар дән риза. Сөз жоқ, бұл ауданның 90 жылдығы қарсаңында жасалған игі істердің бірі болды.

Ертай ЖӘНІБЕКОВ,

аудан әкімінің баспасөз хатшысы

Сообщение Ақжал кентінде көше жөнделді появились сначала на «ORTALYQ QAZAQSTAN» газеті.

Кітаптан гөрі екі қолға бір «сотка» ұстаған заманнан қашып құтылмасымыз тағы анық. Осы жағдайда мектеп қабырғасында кітап оқып, одан ой қорытып, пікір айта алатын баланың беделін көтеріп, басқасына үлгі етсек, қой деген ешкім жоқ. Ғаламторға арбалған оқушы кітап оқымасын сылтау қылу саналы педагогтың қайсына ләзім?! Алдын алып, амалын тауып, акциялар ұйымдастырып, кітапқұмардың мәртебесін неге көтермеске, ендеше. Бұл орайда бұрындары мектептерде «Бір ел – бір кітап» акциясы өтетін. Қазір осы шара облыс-облыстың түпкір-түпкірінде «Бір аймақ – бір кітап» айдарымен қолға алынуда.

Мектеп оқулығына енген бір автордың шығармасындағы асыл мәйекті оқушының санасына сіңіріп, жан байыту мұратындағы жақсы жоралғының бірін Шет ауданына қарасты Ақжал кентіндегі Ш.Батталова атындағы ЖОББ мектептің 5-7 сынып оқушылары арасында өткіздік. Онда оқушылар облыстық «Бір аймақ – бір кітап» акциясы аясында жазушы Бердібек Соқпақбаевтың «Балалық шаққа саяхат» повесін оқып, түйген ойларын ортаға салды. Нәтижесі жаман емес. Оқушылар повестегі оқиға желісін бірінен кейін бірі іліп алып әңгімелей жөнелгенде, еңбегі жанған ұстаздың қуанышында шек болмасы анық қой. Бірі аңдамаған тұсты екіншісі толықтырып тұрса, мұғалімге одан асқан мерей жоқ.

Жауқазын ӘБЖАНОВА, 7-сынып оқушысы:

– Кітаптағы Бердібек атамыз­дың балалық шағы, сол кездегі оқиғалар бояуы көзіңе жас ірікпей қоймайды. Себебі, сол кездегі балалардың бастан өткерген қиындықтары тым ауыр. Күнделікті қорегі – бір уыс талқан ғана. Ата- анадан жырақтағы 8 жасар баланың ауыр жұмысқа жегілгені. Осының бəрі қай оқырманның болсын жүрегін елжіретері анық. Қанша мехнат шексе де, оқуда да үздік, ынталы балалардың мойымағаны – бізді жігерлендіріп, намысымызды қамшылады.

Мүгілсім ҚҰСАЙЫНОВА,

Ш.Батталова атындағы орта мектептің қазақ тілі мен әдебиеті пәні мұғалімі.

ШЕТ ауданы.

Сообщение Кітап пен ғаламтор появились сначала на «ORTALYQ QAZAQSTAN» газеті.

– Еске алып көріңізші, неден бастадыңыздар?

– Ұмытпасам, 1990 жылдың көктемі болса керек. Ақжал кентінің сыртына он шақты киіз үй тіктік. Әрине, қыс ызғары әлі кете қоймаған. «Түске дейін мүйіз, түстен кейін киіз». Қатқан қарды сырып тастап, үй тігетін жерді тазалап, алдын ала дайындық жұмыстарын жүргіздік. Шіркін, даланың сәні ақ шаңқан киіз үй ғой. Доғаға ұқсатып дөңгелене тігілген киіз үй бой көтерісімен, ауылдың сән-салтанаты кірді де кетті. Салт-дәстүр, әдет-ғұрыптың біразынан көз жазып қалған екенбіз, көбісі көкіректе сайрап тұр. Ең бірінші киіз үйдің ішін бабалар аманатына сай жабдықтауға кірістік. Сол кезде зерделі әжелер, ауыл ақсақалдары болды. Киіз үй жабдықтары табылды. Ауыл ішінен көш керуен жүргізуді де ұмытқан жоқпыз. Ат үстіндегі бес қаруын асынған батырлардың сыртқы көрінісі қандай тартымды еді. Ошақта от маздады, наурыз көжені бұрқыратып, таңынан бастап қайнаттық. Қыстан қалған сүрдің иісі, жарықтық, бүкіл далаға жайылды. Бабаларымыз қандай данышпан, көреген еді. «Ұлыс оң болсын, ақ мол болсын», – деген игі тілек жан дүниеңді жадыратады. Өзіміздің жаңа жыл басы. Алладан тіледік, аузымызды ақтан айырмасын дедік. Келе жатқан жаз берекелі, ырысты болсын дедік. Сөйтіп, күн мен түн теңеліп, наурыз мерекесі қазақ даласын шарлап кете барды. Шындығында, жер-дүние мен адамзаттың бір сілкінетін кезі болады. Қыс бойғы ауыртпашылық артта қалып, жеңілдеп, алдағы күнге ізгі үмітпен қарау қандай ғанибет. Тұрмыс-салттың ертеден қалыптасқаны, сөйтіп, оны шаруашылық мейрамына айналдыру бабалардан қалған базарлық. Осы Наурыздың өн бойында ұлтымыздың салт-дәстүрі, әдет-ғұрпы таңғы шықтай тұнып тұр емес пе? Бойжеткендер сәукеле киіп, ұлттық киімді жарқырата көрсетсе, жігіттеріміз ұлттық спорт түрін бағдарламаға енгізіп, оны жұртшылыққа өздері насихаттады. Арқан тартыс, асық ойнау, қазақ күресі, көкпар, бәйге – барлығы осы мейрамда көрініс табуы керек сияқты. Біз бар мүмкіндікті Наурыз тойында көрсетуге ұмтылдық. Үлкенді сыйлау, құрметтеу, домбыра, қобыздың үнін шығарып, ауылды әнге бөлеу, алтыбақан аясында жастар шоғырланып, жиналып көңілді кеш өткізу, сырласу – шындығында бір әдемі дүние. Бара-бара Наурыз мерекесін өткізуге машықтандық. Кенттегі өндірістің әр цехы, ауыл ішіндегі әр мекеме киіз үй тігуді қолға алды. Мектеп, аурухана, балабақша ұжымы жылма-жыл наурыз мейрамын жоғары деңгейде өткізуге белсене араласады. Қыдыр атаның батасы әр жүрекке жетеді. «Жақсы сөз – жарым ырыс» дейді ғой атам қазақ.

– Ақжал кенті көп ұлтты емес пе?

– Иә, мұнда 4 мыңға тарта халық тұрады, орыс, неміс, корей ұлтының өкілдері бар. Олар қазақтың әдет-ғұрпын бойына сіңірді ғой. Тіпті, мына өндіріске сонау Ресейден келген жұмысшы мамандар да бізбен бірге наурыз тойын тойлап, шат-шадыман күй кешеді. Ауылдағы «Шұғыла» мәдениет үйінің өнерлі жастары да әр кез наурыз мерекесінің халықтық тұрғыда өтуіне ұйытқы болып жүр.

– Менің ойымша, – деп түйіндеді әңгімесін Серік Қамбарұлы, – Наурыз мерекесі – әр адамның жан дүниесінің жаңаруынан бастау алады. Әр үйдің ауласы тазаланады. Үйдегі тұрмыстық заттар жуып-шайып, ретке келтіріледі. Бір-бірімен ренжіскен адамдар табысып, кешірім өтінеді. Тал егіп, елді мекенді көркейту керек. Наурыз көженің иісін бұрқыратып, әр дастарқанның сәнін келтіру, барша адамзатқа жақсылық тілеу, арқа-жарқа мерекелік күй кешу – ғажап дүние.

Иә, ұзақ жылдар бойы Ақжал кентінде байланыс бөлімшесінің бастығы болған ақсақал Серік Қамбар­ұлын біраздан бері білеміз. «Ерен еңбегі үшін», «Қазақстан Республикасының тәуелсіздігіне – 25 жыл», қазақтың ұлы сардары «Баян батыр» медальдарының иегері. Әр жылдары Ақадыр аудандық жергілікті байланыс бөлімшесінің бастығы, халықтық бақылау комитетінің төрағасы, ауылдық, селолық кеңестің төрағасы секілді қызметтерді абыроймен атқарған. Ұлы Отан соғысынан оралмаған жерлес жауынгерлер құрметіне ескерткіш-тақта орнату туралы бастама көтеріп жүр. Айтпақшы, биыл Серік Қамбарұлы 70 жасқа толып отыр. Сонымен қатар, өмірлік жары Светлана Әнуарбекқызымен отау құрғанына елу жыл екен. Аһарлы-шаһарлы әулет. Бақытты, берекелі ғұмыр кешіп келеді, немере, шөберелер өсіп жатыр.

Оралбек ЖҮНІСҰЛЫ

ШЕТ ауданы.

Суретте: еңбек ардагері Серік Қамбарұлы мен өмірлік жары Светлана Әнуарбекқызы екеуі бала шағасының ортасында.

Сообщение «Өнегеңнен айналдым, әз Наурыз!» появились сначала на «ORTALYQ QAZAQSTAN» газеті.

    Салтанатты рәсім кенттегі «Ақжал» кафесінде өтті. Шарада «Nova Цинк» ЖШС Бас директоры Сүйіндік Асан, «Nova Цинк» ЖШС кәсіподақ ұйымының төрағасы Берік Қаппаров көктемнің алғашқы лебімен келіп жеткен халықаралық мейраммен әйелдер қауымын құттықтады.

   «Шұғыла» мәдениет үйінде Ақжал кенті әкімшілігімен біріккен үлкен мерекелік кеш өтті. Ақжал кентінің әкімі Д.Молыбаев көпбалалы аналарға бағалы сыйлықтар мен гүл шоқтарын сыйлады. «Nova Цинк» ЖШС-нің ұжымы кәсіпорынында талай жыл тер төккен 75 ардагер қарияға 550 мың теңге көлемінде сыйақы үлестірді. Кеш соңы концерттік бағдарламаға ұласты.

«Nova Цинк» ЖШС-нің әлеуметтік бөлімі.

ШЕТ ауданы.

Сообщение Кәсіпорын қамқорлығы появились сначала на «ORTALYQ QAZAQSTAN» газеті.