«Тәуелсіздік пен даму символы»

«Республика күні – Қаза­қс­тан үшін тек тарихи ғана дата емес, сонымен қатар, ұлттық тәуелсіздік пен мемлекеттік дамудың символы. Бұл мереке ұрпақтан-ұрпақ­қа егемендіктің қадірін тү­сіндіріп, елдің бірлігін сақ­тауға үндейтін ұлттық бірегейлікті нығайтып, тә­уел­сіздікті қастерлеу жолын­дағы маңызды мереке болып қала бермек. Дегенмен жастардың Республика күніне деген көзқарасы алуан түрлі. Кейбірі бұл күннің тарихи маңыздылығын терең түсініп, патриоттық рухты сезінсе, басқалары үшін бұл тек мерекелік іс-шаралармен байланысты болуы мүмкін.

Республика күнін жастар арасында кеңінен насихаттау үшін тарихи білімді арттыру, патриоттық тәрбиені күшейту және заманауи форматта ұйымдастырылатын іс-шараларды көбейту маңызды. Мысалы, «Егемендік жолымен» интерактивті тарихи саяхат – еліміздің тәуелсіздікке жету жолындағы маңызды оқиғалар көрсетілетін интерактивті көрме ұйымдастыруға болады. Арнайы технологиялар арқылы виртуалды шындық (VR) көзілдіріктерін пайдаланып, келушілер өткенге саяхат жасап, Қазақстанның тарихи кезеңдерін көзбен көріп, сезіне алады. Әрбір кезеңнің қыр-сырын түсіндіретін ойын түріндегі тапсырмалар қосылса, бұның жастар үшін қызықты әрі тәрбиелік мәні жоғары болары сөзсіз.

Сонымен қатар, Тәуелсіздік туралы заманауи арт-инсталляциялар – қоғамдық орындарда Қазақстанның тәуелсіздік жолын көрсететін үлкен арт-инсталляциялар орнату. Бұл заманауи өнер арқылы тарихты жаңаша көзқараспен таныстырып, өнерге жақын жастарды тартуға көмектеседі. Әртүрлі мүсіндер, граффити және жарықтандырылған инсталляциялар арқылы тарихи оқиғаларды визуалды түрде әсерлі етіп көрсетуге болады.

Ұлттық стартаптар мен инновациялар байқауы – Республика күні тек тарихқа ғана емес, елдің болашағына бағытталған мереке болуы керек. Сондықтан, инновациялық стартаптарды қолдайтын байқау немесе көрме ұйымдастыруға болады. Жас кәсіпкерлер мен ғалымдар өздерінің Қазақстанның дамуына қосатын үлестерін көрсетіп, озық идеяларын ұсына алады. Бұл елдің болашағы мен дамуына үлкен мотивация берері анық. Осындай креативті іс-шаралар Республика күнін тек тарихи дата ретінде емес, ұлттық сана мен болашаққа сенім арту күніне айналдыруға көмектеседі. Осылайша, Республика күнін заманауи түрде тойлау жаңа буынға қызықты, ел болашағына бағытталған әрі рухани құндылықтарды сақтайтын мерекеге айналады деген ойдамын.

Құлпынай ЖАСАРАЛ,
маркетолог.