Сырлы да сырбаз Сәкен
Қарағанды қаласының орталықтандырылған кітапхана жүйесінің №11 кітапхана-филиалында қалалық мәдениет, тілдерді дамыту, дене тәрбиесі және спорт бөлімінің қолдауымен «90 жылдыққа – 90 кездесу» жобасы аясында жазушы, ақын, мемлекет және қоғам қайраткері Сәкен Сейфулиннің 130 жылдық мерейтойына орай «Қазақтың кербез сұлу Сәкені» атты портрет кеші өткізілді.
Шараға филология ғылымдарының магистры, Е.Бөкетов атындағы Қарағанды зерттеу университетінің аға оқытушысы Жанайдар Жұмагелдин және аталған білім ордасы филология факультетінің һәм Тәттімбет атындағы Қарағанды өнер колледжінің студенттері қатысты.
Аталған кеш жастарға қазақ халқының ұлттық мақтанышына айналған, қайтпас қайсар күрескер, Алаштың ардақтысы, қазақ әдебиетінің алыбы Сәкен Сейфуллиннің өмірі мен қызметі туралы кеңінен тың ақпараттар беріп, шығармаларын насихаттауды көздеді.
Шараны ұйымдастырушы кітапханашы мамандар бұл міндеттің үдесінен шығып, сырбаз Сәкеннің өмірі мен шығармашылығы және қызметі туралы арнайы дайындалған ақпараттар легін заманауи түрде түрлі құралдарды пайдалана отырып, сұрақ-жауап түрінде ұсынды.
Сөз алған шара қонағы Жанайдар Шәймерденұлы Сәкен Сейфуллиннің жалпы адами бітім-болмысын, ақындық, азаматтық ұстанымын танытатын қасиеттері жөнінде нақты дәйектері арқылы қызықты әңгіме өрбітіп, шығармашылығы туралы тарқатып айтып берді.
Қазақ руханиятына сұлу жырлар мен сырлы да сазды әндерді қатар сыйлаған ақынның «Тау ішінде», «Біздің жақта» әндерін Тәттімбет атындағы Қарағанды өнер колледжінің студенті Абай Шойманов орындап, көпшілікті тәнті етсе, Айғаным Мұратбек, Аида Ертісова дауылпаз ақынның жыр шумақтарынан шашу шашты. Кітапхана оқырманы Нұржанар Серікбол ақын Серік Ақсұңқарұлының «Сәкен аға» деп аталатын арнау өлеңін оқыды.
Шара соңында халқымыздың біртуар перзентінің шығармашылығына арналған кітап көрмесі таныстырылады.
Сәкеннің бірегей тұлғасы, туған халқымен бірге мәңгі жасайтыны сөзсіз. Есімі ел тарихына алтын әріппен жазылған осындай ерен тұлғаның елеулі өмірін ұлт санасында жаңғыртып, кеңінен дәріптеу – баршамыздың азаматтық парызымыз.
Анар ІДІРІСОВА,
№11 кітапхана-филиалының қызметкері.
