«Senat Open» екінші ашық кубогының іріктеу кезеңі басталды

Қарағандыдағы «Достық» үйінде дәстүрлі «Senat Open» екінші ашық кубогының іріктеу кезеңі басталды. Оған Қарағанды облысының барлық қалалары мен аудандарынан 120-ға жуық адам қатысуда.

Қатысушылар арасында барлық деңгейдегі мәслихат депутаттары, қоғамдық кеңес мүшелері, мемлекеттік қызметшілер, ардагерлер кеңесінің мүшелері, БАҚ өкілдері бар.

«Senat Open» екінші ашық кубогін Қазақстан Республикасы Парламенті Сенатының Төрағасы Мәулен Әшімбаевтың бастамасымен және Қазақстан шахмат федерациясының президенті Тимур Турловтың қолдауымен қолға алынған. Қарағанды облыстық мәслихаты һәм облыстық дене шынықтыру және спорт басқармасының ұйымдастыруымен өтіп жатқан турнир шахматты ойынын кеңінен насихаттауға, әуесқой спортты қолдауға бағытталған.

Іріктеу турының қорытындысы бойынша «Senat Open» жартылай финалында ойнауға құқылы 35 үздік қатысушы анықталады.

 – Шахмат адам денсаулығына, ойлау жүйесіне өте пайдалы әрі танымал ойын. Барлық қатысушыларға сәттілік пен жеңіс тілеймін. Өзім де қатысып, бақ сынамақшымын. Жоғары деңгейде өтетініне сенім мол. Облыста ғана емес республикалық деңгейде де шебер ойын көрсетуге жазсын, – деді облыстық дене шынықтыру және спорт басқармасының басшысы Серік Сәпиев.

Турнирдің Бас төрешісі – FIDE халықаралық төрешіcі Батырбек Нұрмағамбетов.

Бұл туралы толығырақ «Ortalyq Qazaqstan» газетінің алдағы сандарынан оқисыздар.

Жәлел ШАЛҚАР