Сұрыптаудағы «Локомотив» спорт кешені жөндеу жұмыстарына жабылды
Сұрыптау бекетіндегі «Локомотив» спорт кешені мен «Дельфин» жүзу бассейіні жөндеу жұмыстарына жабылды. Жоспар бойынша қараша айына дейін жөндеу жұмыстары жүргізіледі.
Спорт кешенінің өзінде футбол, ауыр және жеңіл атлетика үйірмелері бар. Одан бөлек балалар лагері де осында орналасқан. Жөндеу жұмыстарының аясында кешеннің ішкі және киім ауыстыратын бөлмелері толығымен жаңартылады.
Әрі желдету және жылыту жүйелерін де іске қосу жоспарланған. Бүгінде бөлмелерді әрлеу жұмыстары мен терезелерді ауыстыру басталды. Жөндеу жұмыстары аяқталған соң қосымша күрес залы мен шахмат үйірмесі ашылады деп күтілуде.
– Жоспар бойынша жөндеу жұмыстары қараша айында аяқталуы тиіс. Жұмысшылар кестеге сай жұмыс істеп жатыр. Қажетті материал мен жабдықтардың басым бөлігі жеткізілді. Құрылысшылар ауа-райы жақсы болса, кешке дейін жұмыс істеуге тырысады, – деді «Локомотив» СК спорт ғимаратының меңгерушісі Данияр Қайрақбаев
«Дельфин» жүзу бассейні 1995 жылы салынған. Оған тек Сұрыптау тұрғындары ғана емес, Майқұдықтан да келушілердің қатары көп. Бұл ғимаратқа осы уақытқа дейін тек ағымдағы жөндеу жұмыстары ғана жасалған. Биыл шатыры ауыстырылып, желдету жүйесі мен сантехникасы толық жаңартылады.
Сонымен қатар, кешеннің аумағы да абаттандырылады. Келешекте түрлі жастағы балаларға арналған ойын алаңдарын орнату жоспарда бар.
Ербол ЕРБОЛАТ,
Ortalyq.kz
