Пластиктен жасалған полиция көлігі

Абай ауданының Жергілікті полиция қызметі жаңа макет орнатты. Кәдімгі полиция көлігінің. Құрылғы пластиктен жасалған екен.

Мұндағы мақсат айқын. Автокөлік жүргізушілерін сақ болуға шақыру. Әйтпесе, жол-көлік оқиғасы талайдың өмірін қиып жатқаны да жасырын емес.

Мәселен, осы макет орнатылған жол учаскесі – Қарабас елді мекенінің маңайында бірнеше көлік апаты орын алған. Биылғы 9 айда 4 жол-көлік оқиғасы тіркеліп, екі адамның өмірі қиылған. Үш жолаушы зардап шеккен.

Облыстық ІІД Жергілікті полиция қызметі бұл тәжірибенің тиімді боларына сенімді.

Диодты жарық негізінде жасалған пластик макеттің тағы бірі – көлік апаты жиі орын алатын жол учаскесіне орнатылмақ.

«Бастысы, бұл макеттер адам өмірін қорғау үшін қызмет етеді. Көлік жүргізушілері де жол қозғалысы ережелерін бұзбауға бел буады деп ойлаймыз» – деді Абай аудандық ІІБ ЖПҚ бастығы, полиция подполковнигі Сағындық Смаилов.

Өз тілшімізден.