Мерекедегі жан-жақты көмек
Наурыз мерекесі қарсаңында облыстың бірқатар аудандарында мұқтаж жандарға бірреттік материалдық көмек қарастырылған болатын. Бұл жергілікті бюджет есебінен жүзеге асырылды. Сонымен бірге, концерттік шаралар ұйымдастырылып, мерекелік дастарқан жайылды. Азықтүлік те таратылды. Аталған шараларға 510 508,0 мың теңге қарастырылған.
Облыстың жұмыспен қамтуды үйлестіру және әлеуметтік бағдарламалар басқармасының дерегінше, аталған шаралар аясында 17 285 адам қамтылған. Мұқтаж 11 138 адам 494 796,0 мың теңге көлемінде көмек алады.
«Наурыз – бірлік, жаңару, татулық мейрамы!», «Қыдыр атадан кәде сыйлық!», «Наурыз – жаңару мейрамы» секілді мерекелік шаралар мен әлеуметтік осал топ санатындағы азаматтарға арналған мерекелік дастарқан үшін 6 399,0 мың теңге бөлінген. Сонымен бірге, 1 105 адамға азықтүлік себеті табысталады. Оған 6 132,0 мың теңге бөлінген.
Әлеуметтік осал топ өкілдері үшін ақшалай емес көмек көрсетілгенін де атап өту керек. Мүгедек, зейнеткер, аз қамтылған және көпбалалы отбасыларға жататын 785 адамға отын-су, көмір, картоп және басқа да заттай көмек көрсетілді. Оған 2 316,0 мың теңге қарастырылған. Наурыз мерекесін тойлау аясында басқа да шаралар ұйымдастырылды.
Жансая ОМАРБЕК,
Ortalyq.kz
