Балқаш қаласында Мемлекеттік Рәміздер күні мерекесіне орай кең көлемді шара өтті. Қаланың патриоттық жастарының қатысуымен Ағыбай батыр атындағы Оқушылар сарайының алдынан бастау алған «Менің Туым – менің мақтанышым» атты Қазақстан Республикасының Мемлекеттік Туын ұстаушылар шеруі «Жастар» сквері алаңындағы үлкен сахнада патриоттық акциямен жалғасын тапты.
Шара барысында егемендігіміздің басты нышаны – Рәміздердің маңыздылығы жас ұрпаққа дәріптелді. Ә.Мусин атындағы Балқаш гуманитарлық-техникалық колледжі студенттері, «Ветерок» үлгілі хореографиялық ансамблі, «Микс шоу», «Аяла», «Айдарья» би ұжымдары сахна алдында «Менің туым» атты флешмоб орындап, би әуенінің ырғағында еліміздің Мемлекеттік Туы, Елтаңбасы әкелініп, Мемлекеттік Гимні шырқалды.
Балқаштықтарды шаһар басшысы Сапар Сатаев мерекемен құттықтап, егемен еліміздің бірлігі мен берекесін нығайтуда игілікті істері мен тәуелсіз Қазақстан құру жолында сіңірген еселі еңбек еткен ел азаматтарын қала әкімінің Алғыс хаттарымен марапаттады.
– Мемлекеттік рәміздер халқымыздың биік рухын айқындайтын айрықша құндылық. Тәуелсіздігіміздің тұғырлы болуы үшін біз өз елімізді, туған жеріміз бен Отанымызды ардақ тұтуымыз қажет. Оның ең алғашқы қадамы Мемлекеттік Рәміздерді құрметтеуден басталады. Бүгінгі акция біздің балқаштықтардың Мемлекеттік Рәміздерге деген мақтанышын, патриоттық сезімін асқақтата түседі, – деді қала әкімі Сапар Сатаев.
Бұдан кейін қала басшысы мереке аясында Орал қаласында орын алған табиғи апат – су тасқынының салдарын жоюға қатысып, азаматтық ұстаным танытқаны үшін «Балқаш Су» ЖШС-нің және «Балқаш Жылу» ЖШС-нің жүк көтеру экскаваторының жүргізушілері Еркінбай Смайлов пен Әуелхан Қапасты Алғыс хатпен марапаттады. Сондай-ақ, қала әкімінің Алғыс хаттары қаламыздың әлеуметтік проблемаларын шешу жолындағы іс-шараларға және республикалық «Таза Қазақстан» экологиялық акциясына белсене қатысып, биік азаматтық ұстаным танытқан волонтерлер мен белсенді азаматтарға да табысталды.
Олар: Балқаш сервис колледжінің студенттері Нұрсәт Айтжан мен Ақерке Тілекқабыл, Балқаш медицина колледжінің студенттері Мадина Бекетова, Аяулым Рыспай және Гүлзат Алдамұратова, Халық Қаһарманы Р.Қошқарбаев атындағы Балқаш техникалық колледжінің студенті Әлібек Әбен, Балқаш қаласының жұмыспен қамту және әлеуметтік бағдарламалар бөлімінің бағдарламашысы Андрей Наточев, Қоңырат шағын ауданының белсенді волонтері, «Балқаш» қалалық спорт клубының жаттықтырушысы Ержан Асқаров, Балқаш қаласы мәдени-сауық орталығының электригі Дархан Ықыласбеков.
Патриоттық акцияның соңы Қарағанды облыстық филармониясының әншісі, республикалық конкурстардың лауреаты Алмаз Құттыбайдың, мәдени-сауық орталығының әншілері Индира Балкееваның, Ерқанат Сәдуақасовтың, Аманжол Шаймерденов және басқа да өнерпаздардың қатысуымен ұйымдастырылған мерекелік концертке ұласты.
Сондай-ақ, мерекелік шара түстен кейін Қазақстан Республикасының Мемлекеттік Рәміздер күніне арналған автошеру және «Жастар» скверінің бас сахнасында «Патриотизм дауысы» атты мерекелік концерттік бағдарламасымен жалғасты.
Нұрдос КӘРІМ,
БАЛҚАШ
Ortalyq.kz
