Әлемдік бренд бізде өндіріледі
Silk Road Electronics және Samsung Electronics компаниялары Қазақстанда теледидар өндіру туралы келісімге қол қойды.
Келісім премиум серияларды қоса алғанда, Samsung теледидарларының өзекті желісін шығаруды көздейді. Жаңа өндірістік желі Қарағанды облысының Саран қаласындағы Silk Road Electronics кәсіпорнының аясында орналасады. Яғни, болашақта Қазақстанда да, Орталық Азияда да жоғары технологиялық өнімге өсіп келе жатқан сұранысты қанағаттандыру мүмкіндігі тумақ.
– Samsung Electronics электроника саласындағы көпжылдық технологиялық көшбасшы болып танылысымен, ең жаңа технология мен бірегей пайдаланушы тәжірибесін топтап, өз тұтынушысына барынша жақын болуға ұмтылады. Қазақстанда өндірістің бастау алуы біздің компания үшін маңызды рөл атқарады. Бұл біздің өніміміздің жергілікті нарық үшін қолжетімділігін арттыруға теңдессіз мүмкіндік сыйлайды, – деп атап өтті Samsung Electronics Орталық Еуразия Президенті Джонг Юджин ханым.
Өндірісті оқшаулау өнеркәсіптік инфрақұрылымды дамытып, жаңа жұмыс орындарын құруға игі ықпал ететін болады.
– Бұл ынтымақтастық біздің кәсіпорын үшін әрі тұтастай алғанда Қазақстанның өнеркәсіптік дамуы үшін жаңа мүмкіндіктер қатарын ашады. Samsung Electronics компаниясымен бірлесіп, біз қазақстандық тұтынушылар үшін қолжетімді бағамен әлемдік деңгейдегі өнімдерді ұсынамыз, — деді Silk Road Electronics зауытының директоры Александр Критский.
Жоба Өнеркәсіпті дамыту қорының қолдауымен жүзеге асырылды. Өндірістік желіні іске қосу 2025 жылдың екінші тоқсанына жоспарланған. Ал, тұтынушылар келесі жылдың екінші жартыжылдығында қазақстандық өндірістегі Samsung теледидарларын сатып ала алады. Бұл игі бастама өңірдің өндірістік әлеуетін арттырып, аймақтық технологиялық көшбасшылық жолындағы маңызды қадам деп бағамдарлық. Silk Road Electronics пен Samsung Electronics компанияларының бірлескен жұмысы арқылы, елдің индустриалдық инфрақұрылымы нығайып, жоғары технологиялық өнімдердің жергілікті өндірісі өрістейді.
Ерқанат КЕҢЕСБЕКҰЛЫ,
«Ortalyq Qazaqstan»
