Поэзия
“КЕНТАВР” КАРТИНАСЫ АЛДЫНДАҒЫ ОЙ
“КЕНТАВР” КАРТИНАСЫ АЛДЫНДАҒЫ ОЙ
“Құлагермен болады сөйлесуге…”
(Ақан сері)
“Құлагермен болады сөйлесуге…”
Деген бір сөз түседі кейде есіме.
Қазақтікі – басы осы Кентаврдың,
Қалған жағы –
Жылқының бейнесінде.
Арғымақты тек Алаш жыр еткен ғой,
Сонда күллі дүние дір еткен ғой;
Жылқыны біз қолға әкеп үйреткенде,
Жаяу-жалпы жүрген бұл –
Гректер ғой!
Жылқы менен қазақта пейіл – біреу,
Ол басқадан біздерге бейімділеу;
Қазақ еді басында
оның басы!
… Реставрация жасады кейін біреу…
Бұ Кентавр – қазақтың Қарагері!
Ат үстінде асқақтап барады елі;
Басқа ел болса,
Атты емес,
Доңызды алып,
Дөңайбат қып өз басын салар еді!
“Құлагермен болады сөйлесуге…”
Деген бір сөз түседі кейде есіме:
Қазақтікі –
Басы осы Кентаврдың,
Қалған жағы –
Жылқының бейнесінде…
Серік АҚСҰҢҚАРҰЛЫ