Көркем ойдың көшелі көшірмесі
Қарағандыдағы №1 өнер мектебінің тарихы тым әріде. Алғаш ашылған жылдардан бері талай шәкірт түлеп ұшты. Бірі әйгілі әнші, бірі дизайнер. Енді бірі үлкен сахнада жүрген фортепианошы. Қарашаңырақта дәріс беретін ұстаздардың да осалы жоқ. Себебі, бұл мектеп жай ғана үйірме емес, баланы жастайынан кәсібилікке тәрбиелейтін үлкен білім ошағы. Ал, мектептің көркемсурет бөлімінің де әріден келе жатқан тарихы бар. Осы бөлімге түсетін жастардың қарасы да жыл сайын артып келеді. Мектеп ұжымы жас суретшілердің еңбегін көпке көрсету мақсатында биыл он үшінші рет облыстық бейнелеу өнері музейінде есеп беру көрмесін өткізді.
Аталған мектепте барлығы 81 мұғалім бар десек, оның 13-і көркемсурет үйірмесінен дәріс береді екен. Барлығы 1210 бала дәріс алса, оның 342-сі – өнер бөлімінде. Әрі жас ерекшеліктеріне қарай бірнеше топқа бөлінген. Бұл көрмеге 4-17 жас аралығындағы 342 оқушының 380 жұмысы қойылған. Әрі 51 дипломдық жоба да бар.
– Екі жылдан бері музей ұжымымен шығармашылық ынтымақтастықтамыз. Балалар үшін осындай мүмкіндік берген музей ұжымына алғысымды білдіремін. Көрме бір аптаға созылады. Ал, осы уақыт аралығында біз мектеп оқушыларын осында алып келіп, шеберлік және ашық сабақтарын өткіземіз. Сонымен қатар, басқа қаладағы өнер мектептерінің мұғалімдері мен балаларын да шақыратын боламыз. Талантты балалар көп бізде. Бірақ, көрмеге қойылатын суреттерді арнайы таңдап алдық, – деді №1 өнер мектебінің директоры Салтанат Елешева.
Бұл көрме бұрынғы көрмелерден өзгерек. Олай дейтініміз, көрмеге келген қонақтар тек туындыларды тамашалап қана кетпейді. Өнер мектебінің шәкірттері мерекелік концерт қойып, керемет көңіл күй сыйлады. Әрі үлкен залдың қақ ортасына төрт аялдама орнатыпты. Біріншісі – театрландырылған аялдама. Яғни, мұнда балалар аялдама жетекшісінің берген тапсырмасына сәйкес қойылым қояды.
15 жастағы Сабина Көмек – көркемсурет бөлімінің IV курс студенті. Биыл ол өзінің дипломдық жұмысын қорғайды екен. Көрмеге жас суретшінің үш туындысы қойылыпты. Оның біреуі – дипломдық жұмысы.
– Өнер мектебіне даярлық сыныбына қабылдандым. Биыл мектепті тәмамдаймын. Жыл сайын музейге туындыларым қойылады. Дипломдық жұмысымның тақырыбын үшінші курста жүргенімде-ақ таңдадым. Себебі, дипломдық жұмыс дегеніңіз – біз үшін үлкен сынақ іспетті. Көп ойлана келе, «Орта Азия елдерінің аңыз әңгімелері» тақырыбындағы дипломдық жұмысымды дайындадым, – дейді жас суретші.
Оның дипломдық жұмысында Түрік қағанатының негізін қалаушы Бумын қағанның балалық шағы бейнеленген. Ел аузында кеңінен тараған Бумын қаған жайындағы аңыз әңгімелер көп. Соларды негізге алған. Суретте бала Бумынның апанның ішінде отырғаны бейнеленіпті. Ал, оның маңайына үш қасқырды салған. Бұл сурет жайында автор:
– Адам мен жануардың, адам мен табиғаттың бір-біріне деген байланысын көрсеткім келді. Әрі аңыз әңгімелерді де негізге алуға тырыстым, – деді ол.
15 жастағы Полина Фрид те – биыл мектеп бітірушісі. Оның көрмеге алты суреті қойылыпты. Басқаларға қарағанда Полинаның стилі ерекше. Салған туындыларының басым бөлігі қара қарындаш және қара қаламмен салынған.
– Негізі, суретті түрлі-түсті бояулармен, акварель және тағы басқа да құралдармен сала аламын. Бірақ, түстерді еркін пайдалана алмаймын. Қара қарындаш және қара қаламмен салған суреттерім өзіме ерекше ұнайды. Басқа да туындылардың ішінде ерекшеленіп тұрады, – дейді жас суретші.
Барлық туындылар – көркем ойдың көшелі көшірмесіндей.
Сонымен қатар, көрме барысында даярлық тобын тәмамдаған 49 баланы салтанатты түрде І курсқа қабылдады.
Ербол ЕРБОЛАТ,
«Ortalyq Qazaqstan»
Суреттер ұйымдастырушылардан
