Азия ойындарына қатысқан облыс спортшылары марапатталды
Аймақ спортшылары XIX жазғы Азия ойындарында ел намысын қорғап, құрама қоржынына бір күміс және бес қола медаль алып келді. Облыс әкімдігінде жүлдегерлер мен олардың жаттықтырушыларын жеңістерімен құттықтап, ақшалай сертификаттар табыстады.
– 1951 жылдан бастап әр төрт жыл сайын өткізіліп келе жатқан Азия ойындарының маңызы мен рөлі өте зор. Сіздер тек Қарағанды облысының ғана емес, бүкіл Қазақстанның мақтанышысыздар! Керемет үздік нәтижемен құттықтаймыз! – деді спортшыларға облыс әкімінің орынбасары Бауыржан Асанов өзінің құттықтау сөзінде.
Азия ойындарында 25 жастағы жерлесіміз Данил Мұсабаев батут гимнастикасында күміс жүлде жеңіп алды. Бұл Азия ойындарындағы батут гимнастикасы спорты бойынша қол жеткізген алғашқы күміс медаль.
Данил Мұсабаев батут гимнастикасымен 22 жыл айналысады, халықаралық дәрежедегі спорт шебері. Данилды ҚР еңбек сіңірген жаттықтырушысы Сергей Вертянкин дайындайды.
– Бұл менің алғашқы Азия ойындарым, жарақат салдарынан өткен ойындарды жіберіп алдым. Өте қатты толқыдым, бірақ біз жеңіске қол жеткіздік. Енді әлем чемпионатына лицензия ұтып алуды жоспарлап отырмыз. Мен қарқынды дайындаламын, – деді Данил Мұсабаев.
22 жастағы Кирилл Тубаев байдаркада ескек есуден қола медальмен қуантты. Оның жаттықтырушысы Евгений Егоров – 2010 жылғы Азия ойындары медалінің иегері.
Синхронды жүзуде де үздік нәтижелер бар. Бұл спортта Арина Пушкина мен Ясмин Тұяқова Немич апалы-сіңлілердің ізін басып, даңқты тарихты жалғастырды. Кездесуде синхроншылардың жаттықтырушысы Елена Котованың еңбегі атап өтілді. Ол 32 жыл бойы ұлттық құраманың мүшелерін дайындап келеді.
– Біздің қыздар небәрі 17 жаста, бірақ оларда жеңіске деген ерік пен жігер бар. Олар өте ұйымшыл, командалық рухтары да мықты. Азиада алдында қатаң іріктеу болды және біздің облыстан бірден алты спортшы таңдалғаны кездейсоқтық емес. Бұл керемет нәтиже, ал қыздар үмітті ақтады. Бірінші күннен бастап мен олардың жүлделі орынға ие болатынына толықтай сендім, – дейді Елена Котова.
Аида РАХЫМҚҰЛОВА,
ortalyq.kz
