Аудио ертегілер байқауы өтеді
Шара 1 наурызда басталып, 14 сәуірге дейін жалғасады. Облысымыздың тұрғындары Қарағанды облыстық зағиптар мен нашар көретіндерге арналған арнайы кітапхана ұйымдастыратын қазақ және орыс тілдеріндегі “Ертегілер әлемі” аудио ертегілер байқауына қатыса алады.
– 1-17 наурыз аралығында конкурсқа қатысу үшін өтінімдер қабылданады. Конкурстық жұмыстарды қабылдау 18 наурыздан басталып, 14 сәуірге дейін жалғасады. Қорытындысы 22 сәуірде шығарылады. Конкурсқа 18 жастан асқан тілек білдірушілер қатыса алады. Аудио сыртқы шу, жаңғырықсыз, жоғары сапалы болуы керек. Mp3 немесе WAV жазу форматында болуы тиіс. Аудиожазбаның ұзақтығы бойынша шектеулер жоқ. Шығарма толығымен оқылуы керек, шығармалардан үзінділер жіберуге тыйым салынады, – деп хабарлады Қарағанды облыстық зағип және нашар көретіндерге арналған арнайы кітапхана мамандары.
Жұмыстар келесі өлшемшарттар бойынша бес балдық бағам бойынша бағаланатын болады:
– жұмыстың конкурс мақсатына сәйкестігі;
– орындау шеберлігі;
– аудиожазбаның сапасы және жұмыстың техникалық талаптарға сәйкестігі.
Конкурстың қорытындысы шығарылғаннан кейін аудио ертегілер Қарағанды облыстық зағип және нашар көретіндерге арналған арнайы кітапхана қорына беріледі. Байқаудың қазылар алқасы дипломдар мен ақшалай сертификаттарға ие болатын үш жеңімпазды анықтайды. Сондай-ақ екі арнайы номинация құрылады.
Конкурсқа қатысу үшін өтінімді және “Аудио ертегі” деген белгісі бар аудиожазбаны audiobook2024@mail.ru электрондық поштасына жіберу қажет. Қосымша ақпаратты конкурстың ережесімен сілтеме бойынша танысу арқылы алуға болады @spec_biblioteka_krg немесе нөмірлер бойынша: (8-7212) 53-6-63, 53-69-46.
Әділет ШОПЕН.
