Қарағанды әуежайына 81 млн теңге айыппұл салынды
Бәсекелестікті қорғау және дамыту агенттігінің Қарағанды облысы бойынша департаменті «Сары-Арқа» әуежайы» АҚ-на қатысты тергеу жүргізді. Оның барысында компанияның 2018-2019 жылдары ішкі әуе желілері бойынша авиаотынға монополиялық жоғары баға белгілегені анықталып, іс қозғалды, деп хабарлайды ortalyq.kz ҚазАқпарат сайтына сілтеме жасап.
Сол себепті Қарағанды қаласының әкімшілік істер жөніндегі мамандандырылған ауданаралық сотының қаулысымен «Сары-Арқа» әуежайы» АҚ әкімшілік жауапкершілікке тартылды.
Оның 50 240 000 (елу миллион екі жүз қырық мың) теңге мөлшерінде монополиялық табысы тәркіленіп, 31 104 912 (отыз бір миллион бір жүз төрт мың тоғыз жүз он екі) теңге әкімшілік айыппұл салынды.
Сот қаулысы заңды күшіне енген соң әуежай 50 240 000 (елу миллион екі жүз қырық мың) теңге мөлшерінде монополиялық табысты төледі.
Соттың ұйғарымы бойынша әкімшілік айыппұл бөліп төленді. Бұл туралы 30 қаңтарда әуежай департаментке растайтын құжаттары бар хат ұсынды.
Осылайша, мемлекет кірісіне жалпы сомасы 81 344 912 теңге айыппұл өндірілді.
