Қарағанды облысында 15 тәулікке қамауға алынған әкім қызметінен босатылды
Қарағанды облысы Бұқар жырау ауданы Ғабиден Мұстафин атындағы ауылдың әкімі мас күйінде көлік жүргізгені үшін қамауға алынғаннан кейін қызметінен босатылды.
Мұндай шешімді Бұқар жырау ауданының әкімдігі қызметтік тексеру қорытындысы бойынша қабылдаған.
– Қолданыстағы заңнама нормаларына сәйкес, әдеп жөніндегі кеңестің шешімі негізінде 7 наурызда Бұқар жырау ауданының әкімдігі ауыл әкімін мемлекеттік қызметтен босату туралы қаулы қабылдады, – деп хабарлады аудан әкімдігі.
Қарағанды облысы бойынша мемлекеттік қызмет істері департаментінің баспасөз қызметі әкімнің қызметтік тергеу барысында қызметтік этика нормаларының бұзылғанын мойындағанын да хабарлады.
Еске сала кетейік, бұған дейін Қарағанды облысында Бұқар жырау ауданындағы ауыл әкімі 15 тәулікке қамауға алынып, жүргізуші куәлігінен де айырылған еді. 2024 жылғы 3 ақпанға қараған түні жол полициясының қызметкерлері оны қызметтік көлігімен жүргенде ұстаған. Әкім мас болған.
Бұл бұрынғы әкімнің алғаш рет заң бұзуы емес екені белгілі болды. Ол бірнеше жыл бұрын қызметтік көлікті мас күйінде айдағаны үшін ұсталып, жүргізуші куәлігінен айырылған.
Ілияс ДҮНГЕНБАЙҰЛЫ.
