Қайсарлығына қайранбыз
«Жүрегің мықты болу керек. Апатқа түскен жандарға алғашқы ем-дом жасайтын – бізбіз. Кез келген жағдайды эмоцияға берілмей, салқын қабылдау керекпіз. Әйтпесе, түрлі жарақат алғандарды көріп, жаның түршіксе, қолың дірдек қағады. Сол себепті, біздің жұмыс жұмсақтықты қажет етпейді», – дейді Қарағандыдағы Апаттар медицина орталығының құтқарушы-дәрігері Алмагүл Алдабекова.
Рас-ау, апат кезінде түрлі ауыр жарақат алған адам алдыңа келгенде абдырап қалмай, алғашқы көмек көрсету үшін жүректің түкті болмағы керек. Алмагүл Амангелдіқызы өзіне тиісті қызметті әбден меңгеріп алған маман ретінде абыройлы.
Жас талапкер Алмагүл Бұқар жырау ауданы Суық су ауылындағы мектепті үздік бітіріп, Қарағандының медицина академиясына оқуға түседі. Төрт жылдық білімімен қоса, мамандандырылған алғашқы жедел көмек көрсету бойынша тағы төрт ай біліктілігін жетілдіреді. Алғашқы еңбек жолын Теміржол емханасында дәрігер болып бастаған ол жедел жәрдемде де жұмысын жалғастырады. Кейін өзі тәлім алған Қарағанды медицина академиясында алғашқы жедел көмек көрсету бойынша студенттерге дәріс оқып, білген-түйгенімен бөліседі. Тәжірибе, тәлімін әбден жетілдіріп алған соң, қазіргі қызметіне ауысады. Мұндай мықты медицина маманы Апаттар медицина орталығына ауадай қажет еді. Алмагүл Амангелдіқызы ақ халатын құтқарушының формасына ауыстыра салуға бірден келісіпті. Келіскен себебін өзі былай түсіндіреді:
– Академия қабырғасында алғашқы жедел көмек көрсетуді оқыдық. Мықты деген медицина мамандарынан тәжірибе түрінде үйрендік. Кейін «Жедел жәрдемде» дәрігер болдым. Одан соң студенттермен білгенімді бөлістім. Әр дәріс сабағына тыңқылықты дайындықпен бару қажет. Соның арқасында менің де білімім жетіліп отырды. Бірден қазіргі орталыққа қызметімді ауыстырдым. Әрине, мұнда жұмыс істеу үшін өжеттілік керек. Өмір болған соң, түрлі қатер де болады. Содан зардап шеккендерге ем-дом жасап, жанын аман алып қалуға күш салсақ деген ниет болды менде.
Қайсар қыздың орталық қабырғасында қызмет етіп жатқанына бес жылға жуықтапты. Тіпті, Түркиядағы зілзала кезінде құтқару жұмысына қатысқан. Ондағы ауыр оқиғаны терең тебіреніспен еске алып, әңгімелеп берді.
– Сол жолы іріктелген құраммен Түркиядағы Нұрдағы қаласына ұшып бардық. Біз Қазақстан елінің атынан келдік. Алғашқы күні кірпік қақпай жұмыс істедік. Баласын іздеп шарқ ұрған ананы, әкесін күтіп отырған баланың зарын естіп, баспанасыз қалған, шарасыз күй кешкен елді көріп, жанымыздың жабыққанын несіне жасырайын? Өз-өзімізді жинап, жұмысымызды әрмен қарай жалғадық. Менің жұмысым – алғашқы көмек көрсету. Ем-домымды жасадым. Азан-қазан болған жұрттың көбінің күйзелістен қан қысымдары түсіп кетіп жатты. Біріне өксіктен дем жетпеді. Соның бәріне көмек көрсеттік. 9 ақпан күні Қарағандыдан барған құтқарушылар үйіндіден үш адамды тауып, аман алып шықтық. Сонда бос келмегенімізді түсіндік. Адамның өміріне араша түсу – ол деген үлкен нығмет. Жанын сақтап қалған сайын біз керемет күй кешеміз. Адам – ең құнды байлық. Үлкен байлыққа кенелгеннен де керемет әсер аламыз, – дейді қызметіне адал Алмагүл.
Алмагүл Алдабекованың Түркиядағы құтқару жұмысы кезіндегі күн-түнгі еңбегі еленді. Мемлекет басшысы қызметтік борышын атқарудағы жанқиярлығына «Ерлігі үшін» медалін табыстады.
Биыл да орталыққа түскен дабыл дамыл таптырмағанын айтады. Көбіне жол апатына түскен жандарға көмек көрсетіпті. «Биыл «Қарағанды-Алматы» күрежолында жан түршігер жол апаты өте көп болды. Неге екенін білмейміз, мүмкін жол жөнделіп жатқаннан болар, жаз бойы сонда жүрдік. Дабыл түскен сайын орталықтан терең күрсініп алып, шығамыз. Сосын шыдамдылық танытамыз. Айтуға аузымыз бармайтын түрлі апаттарға барып, ондағы адамдарды алып шығып, медициналық көмек көрсетеміз. Оңай емес», – дейді құтқарушы-дәрігер.
Алмагүл Амангелдіқызы – бір әулеттің келісті келіні. Төрт бірдей ұлдың анасы. Жолдасы Абай Сағатұлы ішкі істер саласында еңбек етеді. «Екеуміз де елдің амандығы үшін қызмет етіп жүргендіктен, бір-біріміздің жанымызды түсінеміз, қолдау көрсетеміз», – дейді.
Үлкен ұлдары Бексұлтан фагот аспабында ойнаса, Нұрасыл домбыраны шебер тартады екен. Ал, Әділбек есімді балалары жүзуге қатысады, шахмат ойнайды. Кенжелері балабақшаға барады.
– Екі ұлымыз әнге әуес, күйге құмар. Өнер саласына бет бұрады деп отырмыз отағасы екеуміз. Үшіншіміз спортты жақсы көреді, жолымызды сол жалғар, – дейді анасы күлімдеп.
Алмагүл Амангелдіқызы – медицина саласындағы 15 жылында қаншама адамның өмірін аман алып қалды. Өжет дәрігердің ерік-жігеріне біз де қайран қалдық. Қара нардай қадірлі аналардың ізін жалғағандарды алыстан іздеп жүрсек…
Қасымхан БҮРКІТҰЛЫ,
Ortalyq.kz
