Аймақта 1 қазаннан бастап жылыту маусымы басталады
Қарағанды облысында жылу кезең-кезеңмен беріле бастайды. Облыс орталығында және басқа да бірқатар қалалар мен аудандарда жылыту маусымы 1 қазаннан, Балқаш пен Приозерск қалаларында – 10-15 қазаннан басталады.
Жылыту маусымына дайындық туралы аппараттық кеңесте энергетика және тұрғын үй-коммуналдық шаруашылық басқармасының басшысы Тілектес Досаев пен қалалар мен аудандардың әкімдері баяндады.
– Қазіргі уақытта облыс өңірлерінде жылыту маусымына дайындық аяқталды. 613 бірлік жергілікті жылу көздері, 2 400 шақырымнан астам инженерлік желілер, 1124 әлеуметтік мәдени тұрмыстық нысандар және 5 842 көпқабатты тұрғын үйлер дайындығы қамтамасыз етілді, – деді Тілектес Досаев.
Оның айтуынша, 28 қазандық пен 16 турбина жөнделген. Кестеге сәйкес жеті қазандық пен сегіз турбинаны жөндеу жұмыстары жалғасуда. Көмір және мазут қорлары қамтамасыз етілді.
Бірінші кезекте әлеуметтік сала объектілеріне жылу жіберіледі: мектептер, ауруханалар және т. б.
Қарағанды әкімі Мейрам Кожухов бүгін таңертең 2582 көпқабатты тұрғын үйдің 2021-не жылу берілгенін хабарлады. Әдеттегідей бірінші кезекте жылу Майқұдық, Сұрыптау, Пришахтинск үйлерінен кейін Оңтүстік-Шығыс және жаңа қалаға беріледі. Күннің соңына дейін барлық әлеуметтік нысандар қосылуы тиіс.
Теміртауда желілер толтырыла бастады. Саранда да жылыту маусымы 1 қазанда басталады. Осакаров ауданының Молодежный кентінде жаңа қазандық пайдалануға берілді.
– Жылумен жабдықтау мәселесі ерекше бақылауда. Біз жылумен қамтамасыз етудің белсенді кезеңіне өтеміз, сәйкесінше ешкімге бейберекеттікке жол беруге болмайды! Жылыту маусымының өтуіне әрқайсымыз дербес жауаптымыз, – деп атап өтті облыс әкімі Ермағанбет Бөлекпаев.
