Өңірде шағын және орта бизнес бойынша өндіріс көлемі 2 трлн теңгеден асты
Қарағанды облысында шағын және орта бизнес жұмыспен қамтылған халықтың 42%-ын жұмыспен қамтамасыз етіп отыр. Аймақ экономикасында бұл сектордың рөлі үнемі өсіп келеді. Дегенмен, шешуді қажет ететін мәселелер бар, деп хабарлады облыс әкімінің баспасөз қызметі.
Кәсіпкерлер өңір басшысы Жеңіс Қасымбекпен және “Атамекен” ҰКП Төралқа төрағасы Райымбек Баталовпен кездесуде бизнестің дамуына не кедергі екені ашық айтылды.
– Қарағанды облысында бизнес өте белсенді. Біз бизнес-қоғамдастықпен тоқсан сайынғы кездесулер өткіземіз. Мақсат – жүйелі мәселелердің спектрін анықтау. Біз үшін тек талқылау ғана емес, олардың шешімдерін табу маңызды. Жергілікті атқарушы билікпен тығыз ынтымақтастықта жұмыс істейміз. Бұл кәсіпкерлік үшін қолайлы ахуал туғызу үшін қажет, – деп атап өтті Райымбек Баталов.
Бүгінде облыста 90 мыңға жуық кәсіпкерлік субъектісі бар.
– Өңір әлеуметтік-экономикалық дамудың оң серпінін сақтап отыр. Бұл ретте шағын және орта бизнестің рөлі маңызды. Бұл сектордағы өндіріс көлемі 2 трлн теңгеден асты. Аталмыш көрсеткішті “Қазақмыс” Корпорациясы мен “АрселорМиттал Теміртау” компаниясының көлемімен салыстыруға болады. ШОБ 202 мыңға жуық адамды жұмыспен қамтамасыз етеді – бұл облыстағы жұмыспен қамтылған халықтың 42%-ы, – деді Жеңіс Қасымбек.
Кездесу еркін микрофон форматында өтті. Кәсіпкерлер бизнесті қорғау, салық салу, логистика және инфрақұрылым мәселелерін көтерді. Мысалы, кәсіпкерлер мәмілелерді жарамсыз деп тану тәжірибесін толығымен қайта қарауды сұрайды. Олар сондай-ақ көлеңкелі мектепке дейінгі ұйымдардың қызметіне алаңдайды.
Кейбір сұрақтарға диалог барысында бірден жауаптар мен түсініктемелер берілді. Бірқатар адамдар мүдделі органдардың қатысуымен қосымша кездесулер ұйымдастыруға келісті.
Облыс әкімі әрбір өтініш бойынша мұқият талдау жүргізуді тапсырды. Кездесуде мемлекеттің көмегіне тек ашық жұмыс істейтіндер ғана сене алатынын атап өтті.
