«Жолда қабылдау» акциясы – нәтижелі

Қарағанды полицейлері “Жолда қабылдау” акциясы аясында Қарағанды облысының 90 пунктінде азаматтарды қабылдап, түсіндіру шараларын жүргізді. Соның аясында аймақтың барлық қалалары мен аудандары орталықтарында – 18, сондай-ақ, 70-ке жуық «Аулаларда азаматтарды мобильдік қабылдау» пункті жүйелі жұмыс жүргізді.

Акцияның негізгі мақсаты – автокөлікті тіркеу, жүргізуші куәліктерін, төлқұжаттар мен жеке куәліктерді беру, көлік құралдарын техникалық тексеруден өткізу, жол қозғалысын ұйымдастыру, әкімшілік құқық бұзушылық айыппұлдарын төлеу, құқық бұзушылықтың алдын алу және қоғамдық тәртіпті сақтау және басқа да өзекті мәселелер бойынша жұртшылықтың сауаттылығын арттыру, орын алған оралымсыздықтарды ретке келтіру.

Іс-шара барысында баспасөз қызметінің қызметкерлері әлеуметтік желілердегі полиция департаментінің ресми парақшаларында тікелей эфир ұйымдастырып, жұртшылыққа онлайн режимде сұрақ қою мүмкіндігін тудырды. Азаматтармен кездесулер аумақтық полиция бөлімдері жергілікті полиция қызметтерінің басшылығы, учаскелік полиция инспекторлары, ювеналдық полиция қызметкерлері, жергілікті атқарушы органдары, пәтер иелері кооперативтері мен төтенше жағдай қызметі, сондай-ақ, бұқаралық ақпарат құралдары өкілдерінің қатысуымен ұйымдастырылды.

Акция барысында жедел желі телефонына қаланың беймәлім тұрғыны қоңырау шалып, Қарағанды қаласы, 12 ықшам ауданы, Сталелитейная көшесінде су құбыры құдығының ашық тұрғанын хабарлаған. Оқиға орнына полиция қызметкерлері жедел жетіп, коммуналдық қызметтерді шақыртып, құбыр қақпағын жапқызды.

Полиция қызметкерлері азаматтарды құқық бұзушылықтарға бейжай қарамауға және бұл туралы полицияға шұғыл хабарлауға шақырады.

• Біздің міндетіміз – полицияның барлық қызметтері халыққа барынша жақын болуын және халықтың өзекті мәселелерін білуін қамтамасыз ету. Сондықтан, көпқабатты тұрғын үйлердің аулаларында азаматтарды қабылдаудың қосымша пункттерін жасақтауды дұрыс деп таптық. Сол арқылы туындаған мәселелерді дереу шешу мүмкіндігі бар, – деді Қарағанды облысы полиция департаменті бастығының бірінші орынбасары, полиция полковнигі Құрманғали Ысмағұлов.

Қарағанды облысының аумақтық ішкі істер органдарының бірінші басшылары барлық пункттерде азаматтарды жеке қабылдау өткізді. Акция барысында «жедел желі» телефондары іске қосулы болды.

Бұдан тысқары, полиция қызметкерлерінің заңсыз әрекеттері бойынша сенім телефондары жұмыс істейтіні белгілі.

Жәлел ШАЛҚАР.