«Жеті құндылық» – көрермен назарына

Жақында Теміртау тарихи-өлкетану мұражайында Суретшілер одағының мүшесі Қуат Асқаровтың «Жеті құндылық» көрмесі ашылды. Экспозиция шебердің 60 жылдық мерейтойына орайластырылған.

Көрмеге автордың соңғы жылдары жазылған жұмыстарының циклінен құралған 20-дан астам ауқымды туындылар қойылды.

– Суретші картина салуға шабытты балалық естеліктен алған. Картиналар қазақ мәдениетіне, дәстүріне орайластырылған. Көрерменге өмірлік құндылықтар туралы ойлауға және білуге мүмкіндік береді,– дейді музей қызметкерлері.

Айта кеткен жөн, Қуат Асқаров – суретші әрі кескіндемеші. Теміртауда дүниеге келген ол Н.Гоголь атындағы Алматы көркемсурет училищесін бітірген. Қарағанды облысы әкімі сыйлығының «Жылдың үздік суретшісі» номинация­сының лауреаты әрі Ә.Қастеев атындағы «Үздік шығармашылық үшін» алтын медалінің лауреаты.

– Әр жұмысыма отырған сайын өзімді Құдайдың дәргейінде отырғандай сезінемін. Бұл маған үлкен жауапкершілік жүктейді. Сондықтан, әр туындыма соңғы еңбегім сияқты бар күшімді саламын. Қылқаламым менің 13-ші мүшем сияқты. Денеммен бірігіп кеткен. Жұмыс біткен сәттегі рахатты сөзбен айтып жеткізу қиын, – дейді автор.

Аяулым СОВЕТ,
Ortalyq.kz