Жемқорлыққа жол бермеу – міндет
Облыс әкімдігінде сыбайлас жемқорлыққа қарсы іс-қимыл мәселелері жөніндегі өңірлік комиссияның қорытынды отырысы өтті. Денсаулық сақтау саласында сыбайлас жемқорлыққа қарсы мәдениетті қалыптастыру мәселелері, сондай-ақ, жастар арасында сыбайлас жемқорлық тәуекелдерінің алдын алу әдістері талқыланды. Кеңеске облыс әкімі Ермағанбет Бөлекпаев пен Қарағанды облысы бойынша сыбайлас жемқорлыққа қарсы қызмет департаментінің басшысы Сергей Перов қатысты.
Денсаулық сақтаудағы сыбайлас жемқорлық туралы Қарағанды облысы бойынша сыбайлас жемқорлыққа қарсы қызмет департаменті басшысының бірінші орынбасары Әсет Арыстанбеков хабарлады. Атап айтқанда, қызмет медициналық жабдықтарды тиісті сертификаттар мен куәліктерсіз сатып алудың фактілері анықталған.
– Сыбайлас жемқорлық тәуекелдерін талдау нәтижесінде оларды жою жоспары жасалды. Әр тармақ талдауларға негізделген. Сыбайлас жемқорлыққа қарсы іс-қимыл бойынша қабылданып жатқан шаралардың тиімділігін арттыратын қосымша ұсынысымыз бар. Біріншісі, облыстың медициналық ұйымдарының басшыларын міндетті ротациялау. Екіншіден, сыбайлас жемқорлық тәуекелдерін дербес анықтау үшін медициналық ұйымдардың штат кестесіне комплаенс-офицерлердің оқшауланған дербес лауазымдарын қосуды қамтамасыз ету. Үшіншіден, анықтамада көрсетілген барлық фактілер бойынша тәртіптік сипаттағы қатаң шаралар қабылдансын, – деп атап өтті Әсет Арыстанбеков.
Сондай-ақ, Теміртау қаласының әкімі Ораз Тәуірбековтің, жастар саясаты жөніндегі және ішкі саясат басқармалары басшыларының сыбайлас жемқорлыққа қарсы іс-шаралар туралы баяндамалары тыңдалды.
Аймақ басшысы осы қарқынды бәсеңдетпей, профилактикалық жұмыстарға көбірек көңіл бөлуді тапсырды.
– Қалалар мен аудандардың әкімдері, облыстық басқармалардың басшылары сыбайлас жемқорлыққа қарсы іс-шараларды жүргізуге бағытталған жұмысты бақылауда ұстауы қажет. Оның сапасына ерекше назар аудару керек, – деді Ермағанбет Қабдулаұлы.
Жансая ОМАРБЕК,
Ortalyq.kz