Білім

«Жеңіс терезелерінің» жарығы

Ұлы Жеңістің 80 жылдығына орай Қарағанды қаласының орталықтандырылған кітапхана жүйесінде «Жеңіс терезелері» атты патриоттық акция өтті. Акция аясында М.Әуезов атындағы орталық қалалық кітапхананың 12 филиалында бір уақытта өтіп, терезелеріне Ұлы Жеңіске арналған баннерлер орналастырылды. Баннерлерде соғыс ардагерлерінің фотосуреттері мен олардың есімдері көрсетілді. Бұл – символикалық қадам ғана емес, жас ұрпақты тарихи жадыны сақтауға, ардагерлердің ерлігін ұмытпауға шақыратын мағыналы іс.

Акцияға Қарағанды қаласы ардагерлер кеңесінің мүшелері, Қарағанды жоғары гуманитарлық колледжінің студенттері, Н.Әбдіров атындағы жалпы білім беретін мектептің жас сарбаздар сыныбы және №2 өнер мектебінің оқушылары қатыс­ты. Қарағанды қаласы ардагерлер кеңесінің мүшесі, еңбек ардагері Боранбай Қойлыбайұлы сөз сөйлеп, шараның маңыз­дылығына тоқталып, алдағы Ұлы Жеңістің 80 жылдығымен құттықтады.
Кітап көрмесі ұйымдастырылып, кітапханашылар оқыр­мандарға соғыс тарихы, ардагерлердің естеліктері мен батырлардың өмір жолы туралы құнды деректер беретін әдебиеттерді таныстырды. Көрме жастардың тарихи санасын қалыптастыруға және патриоттық рухын оятуға бағытталған. Сонымен қатар, «Ашық микрофон» форматында әр қатысушы өз ойын білдіруге мүмкіндік алды. Жастар мен оқушылар тарихты білу және құрметтеу әр азаматтың парызы екенін атап өтті.
«Жеңіс терезелері» – бұл тарих алдындағы жауапкершіліктің, өткенді ұмытпауға деген ұмтылыстың белгісі. Акция – жас ұрпаққа батырлардың ерлігін еске салу ғана емес, сонымен қатар, тарихи сананы жаңғыртуға, рухани құндылықтарды насихаттауға арналған маңызды бастама. Ол Қарағанды қаласы әкімдігі мен Қарағанды қаласының мәдениет, тілдерді дамыту, дене тәрбиесі және спорт бөлімінің қолдауымен ұйымдас­тырылды.
Кітапхана оқырмандарға тарихи-танымдық кездесулер, әдеби кештер, көрмелер мен патриоттық іс-шаралар арқылы рухани құндылықтарды насихаттауды жалғастыра береді.

Айдана ҚАБДЫРАШЕВА,
Қарағанды қаласының орталықтандырылған кітапхана жүйесінің
баспасөз хатшысы

Сурет ұйымдастырушылардан

Басқа материалдар

Пікір үстеу

Э-пошта мекенжайыңыз жарияланбайды. Міндетті өрістер * таңбаланған

This site uses Akismet to reduce spam. Learn how your comment data is processed.

Back to top button