Жазасын өтеушілерді босатуға негіз болатын аурулар тізімі жаңарды
Денсаулық сақтау министрлігі жазасын өтеушілерді жазадан босатуға негіз болатын аурулар тізімін кеңейтуді ұсынып отыр. Құжат жобасы «Ашық НҚА» порталында жарияланды.
– Жазасын өтеушілерді арасында өлім-жітімді азайту және ауыр науқастардың денсаулығын сақтау мақсатында жазадан босатуға негіз болатын аурулардың тізімін өзектендіру мақсатында тиісті жоба әзірленді, – делінген құжат жобасында.
Жазадан босатуға негіз болатын аурулардың тізімі келесі дерт түрлерімен толықтырылып отыр:
– бауыр циррозы;
– созылмалы бүйрек ауруы;
– ауыр дәрежедегі созылмалы өкпе ауруы, сондай-ақ гормонға тәуелді аурулар.
Бұдан бөлек, арнайы медициналық комиссияның рөлі күшейтілді: оның міндеттері, функциялары, жұмыс қағидаттары мен құрамы бекітілді.
Сондай-ақ, жазасын өтеушілердің денсаулық жағдайы нашарлаған жағдайда, оны қайтадан медициналық куәландыру мүмкіндігі қарастырылған.
Құжат жобасы 2025 жылғы 5 қыркүйекке дейін қоғамдық талқылауға ұсынылып отыр.
Материалды әзірлеген Аида РАХЫМҚҰЛОВА
