ІІ Дүниежүзілік соғыстағы Жеңістің 80 жылдығы аясында Осакаров ауданында қорғаныс-бұқаралық және әскери-патриоттық жұмыстар айлығы басталды.
Аптаның басында аудан орталығындағы №1 Тірек мектебінің акт залында Әлихан Бөкейхан атындағы, №9 гимназияның негізіндегі және №12 Тірек мектептерінің жасөспірім әскерилер отрядтары сап түзеді. Айлықтың ашылу салтанатына Осакаров ауданы әкімінің орынбасары Динара Көшкенова, білім бөлімі басшысының міндетін атқарушы Гүлнәр Әдірейісова, полиция бөлімі жергілікті полиция қызметінің басшысы Медият Құрамысов, азаматтық қорғаныс бөлімінің басшысы, подполковник Шыңғыс Нұрсейітов, қорғаныс ісі бойынша бөлім басшысы, майор Владимир Герега, Ардагерлер кеңесінің төрағасы Ислам Шәкірбеков, Қоғамдық кеңестің төрағасы Ержан Сүлейменов, Павел Ларин қатысты.
Жасөспірімдердің әскери отрядтарын сапқа тұрғызған лейтенант Сергей Маурер аудан әкімінің орынбасарына айлықтың ашылу салтанатына қатысушылар іс-шараға әзір екенін мәлімдеді. Динара Қаршығақызы ІІ Дүниежүзілік соғыста жеңіске жету үшін аға ұрпақ өкілдері жанын пида етіп, қанын төккеніне, қазіргі күрделі халықаралық жағдайда жастар Отан қорғау үшін әскери-патриоттық жұмыстарға әзір болуы маңызды екеніне тоқталып, жиынға қатысушыларды айлықтың ашылуымен құттықтады. Ауданның қорғаныс ісі бойынша бөлімінің басшысы Владимир Герега, тәжік-ауған шекарасындағы ұрыс қимылдарына қатысушы Бекболат Сағымбеков, әуе қорғанысы күштерінің запастағы қызметкері Нұрболат Фархат болашақ Отан қорғаушыларға оқу мен еңбекте сәттілік тіледі.
Іс-шараның соңында жасөспірімдердің әскери отрядтары жиынға қатысушылардың алдынан салтанатты шерумен жүріп өтті.
Ермек БАЛТАШҰЛЫ,
«Ortalyq Qazaqstan»
Осакаров ауданы
