Абай қаласының қазақ күресімен айналысатын жас балуандары осы айдың аяғында жөнделіп біткен кең спорт залына кіріп, жаттығатын болады.\
Бұл спорт залы Абай ауданы ауылшаруашылық бөлімінің иелігіндегі үш қабатты бұрынғы мектеп ғимаратында орналасқан. Осыдан екі жыл бұрын оның шатыры ауыстырылып, санитарлық-тұрмыстық бөлмелері, соның ішінде, спорт залының шешініп-жуынатын орындары, дәретханасы жөндеу көргенімен де, оның өзін қалпына келтіру кешеуілдей берген.
Соның салдарынан қаладағы мамандандырылған балалар мен жасөспірімдердің спорт мектебінің жас балуандары кезінде акт залы болған аядай бөлмеде бір мезгілде жаттыға алмай, 10-18 жас аралығындағы өрендер амалсыздан үш бөлінетін.
Одан қалды сайлау бола қалса, бұлар жылы орындарын суытып, көрінген босағаны жағалап жүргендері. Өткен жылы осы жағдай жайында «Орталық Қазақстан» газетінде «Қазақ күресіне қамқорлық керек» деп мәселе көтергенбіз де.
Абай ауданының әкімі Сәбит Оспанов бұл дабылымызға бірден құлақ асып, биыл аудандық бюджеттен осы екі залдың ағымдағы жөндеуі үшін 27,6 миллион теңге бөлгізіп, ол жұмыстардың мердігері «Almiri» ЖШС маусым айының басында іске кіріскен екен.
Аталған серіктестіктің құрылысшылары мен мамандары осы мерзім ішінде аумағы 275,5 және 338,7 шаршы метрден тұратын қос залдың есік, терезелерін, едені мен жылу жүйелерін ауыстырып, іргесі мен төбесін сылап, әктеп, еденін сырлап бітіп те қалыпты. Енді осы екі нысан да жоғарыдағы спорт мектебіне жалға берілмек.
Жиырма үш жылдан бері абайлық жас балуандарды қазақ күресіне баулып келе жатқан Орал Исаның қуанышында шек жоқ. Бұған дейін күрестің осы түрінен қаншама разрядшылар мен спорт шеберлігіне үміткерлерді даярлап шығарған оның енді кең жерде еркін көсіліп, бар білгенін балғын балуандарға үйретуге мүмкіндігі бар. Болашақта олардың арасынан көк байрағымызды әлемдік бәсекелер мен жарыстарда желбірететін сан саңлақтың суырылып шығып, көзге түспесіне кім кепіл?!
Өйткені, спорт залдың іргесіне ілінген күш атасы Қажымұқан мен күрестен Париж Олимпиадасының жүлдегерлері Елдос Сметов пен Демеу Жадыраевтың, Ғұсман Қырғызбаевтың үлкен суреттері оларға күш-жігер беріп, жаңа жеңістерге жетелеп бастары хақ!
Ержан ИМАШ,
«Ortalyq Qazaqstan»
Абай ауданы
Сурет автордан
